Dua kandang endur baru dituku bisi penyakit rabies
KUCHING: Pasar Basah, Sg Maong di Kuching enggau Kpg Serikin di Bau iya nya dua kandang endur baru ditetapka bisi igi penyakit berampit ukui gila tauka penyakit rabies, kemari.
Pekara nya dipadahka Sapit Kepala Menteri ti mega Chairman Komiti Mutarka Penusah Ngenyit Nengeri Sarawak, Datuk Amar Douglas Uggah Embas nengah penerang berita.
Uggah ti mega Menteri Betanam Betupi, Tanah Adat enggau pemansang Kandang Menua netapka dua kandang menua nya dibaruh Seksyen 37 (1) Veterinary Public Health Ordinance 1999, bisi igi penyakit rabies.
“Bisi dua kandang endur baru ditemu bisi penyakit ukui gila iya nya Pasar Basah, Sg Maong di Kuching enggau Kpg Serikin di Bau,” ku iya nengah penerang berita, lemai kemari.
Nambahka nya bepelasarka penerang berita ari Sekretariat Komiti Mutarka Penusah Ngenyit Nengeri Sarawak, naka kemari bisi 22 kandang menua nyengkaum dua ke baru , ditemu bisi penyakit rabies.
Kelimpah ari nya penerang berita Sekretariat Komiti Mutarka Penusah Ngenyit Nengeri Sarawak madahka, Komiti Khas Nyeliah sereta Nagang Penyakit Rabies (Sarawak-Kalimantan) udah mutuska sekeda chara dikena napi sereta mutarka igi penyakit rabies ari ke majak berampit lebih agi ba kandang garis antarabansa.
Aum komiti khas (SarawakIndonesia) bechairmanka Sapit Sekretari Perintah Nengeri Sarawak ( Transformasyen Menua Pesisir) ti mega nyadi Sapit Chairman Komiti Mutarka Penusah Ngenyit Nengeri Sarawak Datu Jaul Samion enggau Bapak Muhammad Abdullah, Kepala Kanselerai, Konsulat Jenderal Republik Indonesia Kuching.
“Aum udah ngaga pemutus sereta merambu sekeda chara dikena napi igi penyakit rabieske lebih agi ba kandang garis antarabansa, keterubah, nempa kerejasama di baruh SOSEK MALINDO awakka aum ulih diatur belama nyema bisi pematut.
“Kedua, setuju ngaga vak- sin begulai di baruh Immune Belt sereta ngangkatka pengawa meri penyedar pasal rabies ba kandang menua di garis antarabansa tauka antara menua, ngena chara meri pamplet dalam jaku Bahasa Malaysia enggau Indonesia.
“Nambahka nya ngatur operasyen begulai nengah chara numbuhka SOP entara Sarawak enggau Kalimantan Barat ba garis anatarabansa tauka antara menua ngambika nadai mayuh penanggul nyadi,” ku penerang berita Sekretariat nya.
Nambahka nya entara pemutus ke digaga dalam aum komiti khas nya, nempa komunikasyen ngena seiti pintu iya nya nenagh Opis Servis Veterinar ari (Sarawak enggau Kalimatan Barat) lali, JKNS ulih besambung terus enggau Dinas Kesehatan Kalimatan Barat.
Aum mega ngaga pemutus enda ngemendarka import enggau eksport jelu.
Opis Pengerai Nengeri Sarawak, naka kemari kenyau ari 2 Julai 2017 sida bisi ngerikoda 402 kes ketup ukui baru ditemu ke nyengkaum 31 kes di bagi menua Serian, bagi menua Sri Aman (tiga kes ketup ukui), sereta bagi menua kuching bisi 16 kes ketup ukui ti diripot naka kemari.
Nya ngujungka semua kes ketup ukui 1 ngagai 25 Julai bisi 879 kes, lalu bepeasarka data ari Sepital Besai Sarawak enggau Sepital Serian bisi 568 iku udah datai nerima tuchuk vaksin.
Nyentuk kemari, bisi 3,604 iku ului udah diberi vaksin nengah Program Pelalian Penyakit Rabies di Gelanggang Bola Keranjang Batu 7, Kota Sentosa.
Lalu nya nyadika penyampau semua jelu tupi ke udah diberi vaksin naka ke diatu bisi 17,844 iku nyengkaum 10,204 iku ukui, 7,595 iku mayau enggau 45 iku jelu bukai.
Opis Servis Veterinari Sarawak, minta kerejasama mensia mayuh ngambika ngurung sereta beratika gaya ulah jelu ke udah dituchuk vaksin nya, lalu nyema bisi ngayanka baka ukui gila patut ngeripot jampat ngagai Bilik Operasyen opis nya ba lumur 082- 612949/ 611607 tauka faks 082-613460.