Rayat dipinta seruran bebasaka pangan diri: Simoi

Bebasaka pangan diri enda ngira penatai asal sereta jalai pengarap dikena ngetanka penyerakup

SRI AMAN: Rayat dilalau seruran ngemeranka ulah bebasaka pangan diri nadai ngira bansa, asal penatai enggau jalai pengarap dikena ngetanka penyerakup pupu bansa di nengeri tu, pia ku Kaban Kunsil Nengeri (ADUN) Lingga, Simoi Peri.

Nya alai iya ngansak rayat nejuka pemerat diri ngambika bela ulih begulai meransang runding ti positif agi.

“Enda salah kitai ngatika diri, tang maya kitai gawa, kitai begunaka saup sereta buah runding orang bukai, laban kitai idup begulai enggau mayuh macham raban bansa.

“Ngemeranka idup bekerejasama begulai sereta besaup enggau pangan diri beguna endar dikena ngemujurka langkar pengawa ti deka dipejalaika kitai. Nya alai, kitai patut nyeliahka sebarang penyarut ti tau ngasuh kitai, gempung enggau menua kitai rugi,” ku iya.

Iya mansutka jaku tu lebuh bejaku bejadika Program ‘Jom Raya’ diatur Kawasan Rukun Tetangga ( KRT) Kampung Tengah, Sri Aman bepalan di Gelanggang Futsal 1 Malaysia, tumpuk pendiau nya, semak ditu, malam kemari.

Ku Simoi nambah, pemanah kaul enggau pangan diri ba endur gawa nadai baka kaul enggau diri sebilik empu, taja pia, ulah tu bela beguna dikena kitai nentuka penge- lantang gempung.

“Nyadi sebuah menua ke diuan pupu bansa, kitai patut ngemeranka pemanah ulah sereta kerejasama enggau pangan diri ba pengawa ngemansangka menua ti pulaika pemaik begulai,” ku iya nerang.

Ba lansa ke bukai, ku Simoi, nengah awak dalam pengerami nya, iya ngarapka rayat pupu bansa di Sri Aman terus begulai enggau bala ketuai perintah Barisan Nasional (BN) ngambika agenda politik pemansang ulih seruran dipejalai dataika rayat ulih ngasaika pemansang ti manah enggau menyana agi, seraya nambah, ngambika tetiap komiti enggau gempung di genturung pendiau chakah agi gawaka pemanah nama genturung pendiau sida nengah ulah bebatak asur, puh ngereja pengawa sereta ulih gawa dalam seiti tim.

Nya alai, nengah prisip gawa begulai sejalai ulih nempa gempung ti nyulut agi.

“Perintah dekaka tetiap gempung di genturung pendiau profesional agi, kreatif sereta bisi pemansang,” ku iya.

Tandu iya, dalam pengawa ngangkatka penau gempung perintah mayuh merambu bemacham program ti manah ungkup pengawa nya, sekalika dalam pemansang rama tauka dalam bidang ngenegapka ekonomi.

Sama bisi datai, Chairman KRT Kampung Tengah Khamisita Wasli sereta kaban KRT ke bukai.

Berebak enggau nya, pengerami tu mega dirichah enggau Makai Serumpu Hari Raya, Pekit Bangsal Pemadu Manah sereta pengawa pemerindang enggau lagu hari raya.

Enda salah kitai ngatika diri, tang maya kitai gawa, kitai begunaka saup sereta buah runding orang bukai, laban kitai idup begulai enggau mayuh macham raban bansa. Simoi Peri ADUN Lingga