MBM madahka nadai kes Rabies udah diterima di Miri
MIRI: Opis Kaunsil Mengeri Besai Miri (MBM) bebulaka penerang bekaul igi penyakit ukui gila tauka Rabies udah ngelekai ngagai mengeri tu. Nengah penerang nya madahka bisi lima iku ukui udah dibunuh di Kuala Baram pagi kilah ensana laban ditemu kena rampit virus Rabies.
“Berita tu bula. MBM endang nulak dawa tu sereta mejah ulah ti naburka berita pelesu nya,” pia ku Datuk Bandar Miri, Adam Yii, lebuhka dirandau Utusan Borneo ditu, bedau lama.
Ku Adam, MBM nadai kala ngeluarka sebarang penerang bekaul enggau isu Rabies di Miri laban nadai penyakit ke bansa nya ditemu bisi nyadi di bagi menua tu tauka di utara nengeri tu.
“Sida ti naburka berita tu dataika penerang nya mayuh dikunsi ba media rama kelebih agi dalam ‘Whatsapp’ semina deka ngasuh mensia mayuh ditu begau ngapa. Nyema pekara tu nadai ditemu pengamai nyadi, anang deka nabur berita bula,” ku iya.
“Berindik ari nya, aku minta piak ti bekaul enggau mensia mayuh ti nerima berita ke ditabur tu ngambi ngetu nabur sereta bekunsika berita pelesu tu.
“Aku minta pengawa naburka berita tu diketu tekala nya lalu anang nganti kitai bejalaika atur ti terit sereta ngaga ripot polis mai sida ti ngepunka berita pelesu tu ngagai piak polis ngambika dibai ngagai undangundang,” ku iya nandu.
Nitih ku Adam, nyema penyakit tu bisi di Miri tauka di bagi menua ke bukai, piak ti ngempu tanggungpengawa deka ngeluarka penerang iya nya Opis Pengerai, nengah Sekretariat Komiti Pengatur Penusah Ngenyit Nengeri Sarawak ( Wabak Rabies).
“Semina sekretariat pengatur penusah ngenyit aja tau ngeluarka sebarang penerang ti patut sereta betul, ukai ari kami (MBM) tauka orang bukai,” ku Adam nerang baru.
Ngelansa pasal sebana mensia mayuh, iya ngaku bisi nerima sebana ari piak ti siruka ukui siga ti dipelaba bisi sakit lalu piak sida deka nganjung pemesai penerit adat ngagai endur nya nyema bisi ripot diterima.
“Naka ke diatu, pengawa meresa ti dipejalaika kami ngagai ukui siga di kandang ngelingi Miri, nadai sebarang penyakit ukui gila tauka Rabies bisi ditemu,” ku iya.
Ngelansa bekaul berita ti udah mayuh dikunsi madahka lima iku ukui dirampit Rabies dibunuh di Kuala Baram, iya madahka MBM nadai kala ngereja pengawa munuh sebarang ukui ti sakit tauka siga ba mua mensia mayuh.
Taja pia, raban penerit adat deka nimbak ukui nya ngena ubat bius ti ngasuh ukui nya luput, ngemuntangka pengawa mai jelu nya ngagai palan ngenduh ungkup ukui siga diempu MBM, ngambika atur bukai ulih dipejalai, nyengkaum dituchuk vaksin.
Ba lansa ke bukai, ku Adam, kepenudi MBM ngeluarka penerang bekaul enggau isu nya dalam pun bulan tu tadi, nengah Seksyen Pemeresi Mensia Mayuh enggau Pengawa Ngintu, ngelalau orang ti ngempu ukui ngambika ngurung jelu inang sida ba rumah diri empu, ngambika enda begulai enggau ukui siga ti bisi sakit.
Penerang tu mega minta kerejasama semua orang ti ngempu ukui di kandang menua ari baruh pegai MBM ngambika nyaga pemeresi jelu inang sida sereta nentuka ukui sida enda ngachau orang diau besemak tauka mensia mayuh.
Berebak enggau nya, MBM seruran deka nerima ripot pasal ukui siga sereta neruska pengawa nangkap ukui siga di kandang menua nya.
“Kitai mega nyediaka servis muai bangkai jelu baka ukui enggau mayau ke mati ba endur bukai, nyengkaum mati kena lantak,” ku iya nambah.
Bekaul enggau isu Rabies tauka ukui gila, mensia mayuh dilalau seruran nitihka atur enggau gerah ti diberi Opis Kaunsil Kandang Menua.