Paul Tuah champion Pekit Nyumpit BDCF ba kategori Lelaki Profesional
SIBU: Pemekit ari Sibu, Paul Tuah mujur ngalahka pemekit ke bukai ngulihka gelar champion ba Pekit Nyumpit Pengerami Mantaika Main Asal Dayak Borneo (BDCF) 2017 ba kategori Lelaki Profesional ke diatur Hari Minggu tu tadi.
Nangkan Paul, penuduk lumur dua diempu John Osman ti mega ari Sibu enggau Sirai Sanggin ari Julau ngempu penuduk lumur tiga.
Ba kategori Lelaki Amatur, sekali agi Sirai dipadu ngempu penuduk champion ngalahka Lienus Endam enggau James Lima ke bulih penuduk lumur dua enggau tiga.
Pengelandik sereta peneleba ke dikembuan nejuka Imbau Leyo megai gelar champion ba Kategori Indu Profesional.
Penuduk lumur dua diempu Ellyne Tong Siew Hua enggau Venissa Ugun ngempu penuduk lumur tiga.
Champion kategori Indu Amatur serak tu diempu Lizawati Abdullah ari Julau lalu ditangkan Nurul Pasihah ari Bintangor enggau pemekit ari Sibu, Veronica Pating ba penuduk lumur tiga.
Kategori Lelaki Begulai ( beregu) mandangka Paul Tuah enggau Sanjay Bana ngempu gelar champion.
Chairman Gerempung Nyumpit Sibu (KMS) Mingat Bakil enggau John Osman maya tu dipadu ngempu penuduk lumur dua lalu ditangkan pemekit ari Julau iya nya Sirai Sanggin enggau James Lima ba penuduk lumur tiga.
Ba kategori Indu Begulai, sekali agi pengelandik Lizawati begempung enggau Ellyne maya tu mujur ngalahka pemekit ke bukai ti mandangka seduai bulih gelar champion.
Nurul Pasihah enggau Venissa Ugun ngempu penuduk lumur dua lalu Jessie Hilary Chukan begulai enggau Lansie Anyut ti bela ari Sibu ba penuduk lumur tiga.
Perais sida ke menang ba pekit tu iya nya tropi enggau mata duit disuaka Chairman KMS Mingat Bakil ti mega nyadi chairman komiti pengatur pekit.