Sektor betanam betupi tau meri untung besai
Raban nembiak diperansang ngemeran industri tu ngambi ulih nyungkak penatai pemisi sida
BAU: Raban nembiak enggau orang biak di nengeri tu diperansang ngemeran sereta ngemeratka sektor betanam betupi enggau industri asas tani, ti nyadi sektor besai menua lalu balat dikemeratka perintah diatu.
Sapit Menteri Betanam Betupi enggau Industri Asas Tani, Datuk Anthony Nogeh Gumbek madahka, sektor nya nyengkaum ngemeranka pengawa nupi kelulut.
Iya madahka sektor nya ulih nempa orang dagang biak tauka Agropreneur Biak ti nyulut sereta ulih nambah enggau nyungkak penatai pemisi ruang bilik enggau menua.
“Kitai ngarapka lebih mayuh orang dagang biak ngambi bagi dalam bidang tauka industri betanam betupi sereta ngasilka produk ti nyelai ari orang bukai.
“Kitai chukup ngemeratka pengawa ngasilka pemakai ba menua kitai awakka ulih ngurangka pengawa import tauka bebelika pemakai ari menua bukai, tu ukai semina industri sarang kelulut tang mungkur semua industri betanam betupi enggau pemakai.
“Di Malaysia, kelulut meri penguntung lebih RM4 billion
Kitai ngarapka lebih mayuh orang dagang biak ngambi bagi dalam bidang tauka industri betanam betupi sereta ngasilka produk ti nyelai ari orang bukai. Datuk Anthony Nogeh Gumbek Sapit Menteri Betanam Betupi enggau Industri Asas Tani
ngagai industri asil kampung menua. Lalu dalam industri betanam betupi, kelulut meri penguntung sepenyampau RM66 juta setaun sereta dipelaba niki tiap taun berindik ari indusrti tu ke majak ngerembai,” ku iya.
Nogeh ke mega Kaban Parlimen Mas Gading mansutka pekara nya dalam aum pengarang berita pengudah bejadika Bengkel Nupi Kelulut Agropreneur Biak ke diatur Palan Pansik enggau Pemansang Betanam Betupi Malaysia (MARDI) Sarawak ba Dewan Suarah ditu, kemari.
Iya meransang raban nembiak enggau orang biak lebih agi ba sitak Parlimen Mas Gading patut neleba diri dalam industri sarang kelulut.
“Ari sukut nyual kitai melabaka nadai penanggul, laban ke pemadu beguna chara mungkus tauka nyimpan dalam botol sereta pemeresi enggau selamat diempa patut dikemeratka kelimpah ari madu kelulut tu ke manah ke pengerai,” ku iya.
Lebuh ke nengang pasal bengkel nya, Nogeh madahka objektif program iya nya meri penerang pasal kelulut, meri penerang bakani chara ngelala bansa kelulut ke ulih dijual sereta nerangka pemanah madu kelulut tu ngagai pengerai.
“Ti pemadu beguna iya nya nengah program tu kitai ulih nempa orang dagang baru tauka agropreneur biak,” ku iya.
Nitihku iya, bepelasarka rega makit tauka kebun MARDI rega madu kelulut diatu urung RM120 per kilo- gram sereta bepanggai ngagai chara mungkus.
Nambahka nya asil ari pansik (R&D), pengawa nupi kelulut ti dipejalaika MARDI mujur nambahka asil madu kelulut nyentuk ngagai dua kilogram (kg) ke seiti koloni dalam timpuh sebulan.
Sama bisi datai ngagai pengerami nya kemari bini iya, Datin Caroline Mawas Jonathan Sabai; Kaban Kunsil Nengeri (ADUN) Serembu Miro Simuh; Direktor Indu Opis Palan Promosyen enggau Pemansang Pengawa Dagang MARDI Hassan Said; Direktor MARDI Sarawak Mohammad Noor Adros enggau ke bukai.