Genap anak bisi pengelandik ke patut diansah
Nyema enda mujur ba bidang akademik ukai reti sida enda teulihka pengidup ti menyana
SARATOK: Bala pengajar rebak diatu bisi pangku pengawa besai agi kelebih agi ba kaul begulai enggau apai indai, komuniti enggau nembiak nya empu ba pengawa nempa rebak baru ti bekualiti.
Kaban Parlimen (MP) Saratok, Tan Sri William Mawan Ikom madahka pengawa ke bansa nya dikelala nyadi konsep ‘hybrid’ ti ngemeratka kaul begulai enggau beserakup ari mayuh bengkah piak nentuka tuju sekeda pengawa mujur dijapai.
Ku iya, tetiap polisi dipejalaika perintah deka nadai asil enti nadai sukung enggau komitmen ari rayat.
“Enti kitai bejaku senentang pemujur pelajar, kitai ke nyadi apai indai patut meretika bisi sekeda bala anak kitai enda entu mujur dalam bidang akademik.
“Taja pia, ukai reti sida tu nadai pengidup ti menyana tauka sida deka napi pemar ngiga pengawa maya udah nembuka pelajar sekula ila.
“Tetiap iku anak kitai diberi bemacham pengelandik enggau pengelebih kediri empu.
Tetiap iku anak kitai diberi bemacham pengelandik enggau pengelebih kediri empu. Uji kelala penau sida lalu ansah, anang lembau ngemansangka penau sida laban ari pemujur kitai ngansah penau sida, pengelandik nya deka terus ngerembai. Tan Sri William Mawan Ikom Kaban Parlimen Saratok
Uji kelala penau sida lalu ansah, anang lembau ngemansangka penau sida laban ari pemujur kitai ngansah penau sida, pengelandik nya deka terus ngerembai.” ku iya.
Mawan mansutka jaku nya rambau Pengawa Nyuaka Program Bantu Pelajar Yayasan Sarawak, di Rumah Dayak Saratok, kemari.
Bisi 26 buah sekula udah ngaul diri enggau program tu, iya nya sebuah sekula sekondari lalu 25 buah sekula primari.
Berebak enggau nya, bisi 201 iti baucher mega udah disua ngagai bala nembiak ari sitak Bepilih Kunsil Nengeri (DUN) N39 Krian.
Kenu ku Mawan, penau enggau pengelandik ti dikembuan baka anak bisi mayuh bansa.
Ku iya, bisi anak ngembuan penau dalam bidang lumba, bidang seni, bertukang, nengkebang enggau ke bukai.
Nya alai ku iya, nyadi apai indai ti kiruhka bala anak, sida patut meri peransang terus ngerembaika penau sida dataika bulih pemujur.
“Dalam konteks pemansang pelajar, enda nyentuk nyema pangku pengawa enggau tanggungpengawa ngemansangka modal mensia tauka dikelala enggau jaku ‘talent’ dilempai ba bala pengajar enggau sekula aja,” ku iya.
Berebak enggau pengawa sehari nya, Mawan mega meri temegah ati enggau terima kasih ngagai Opis Pelilih, Yayasan Sarawak enggau Opis Pelajar Bagi Menua ke udah ngatur bemacham program dikena ngangkatka pemanah tikas pemansang pelajar.
“Yayasan Sarawak nyadi sebengkah ejensi perintah Nengeri ti bisi pangku pengawa beguna endar mantu ngenegapka pemansang pelajar di nengeri tu kenyau ari iya ditumbuh dalam taun 1977.
“Nya alai, kitai ngarapka Yayasan Sarawak terus chakah gawa mantu nembiak di nengeri tu, nyulut dalam bidang pelajar menua,” ku Mawan nyemetak.
Sama bisi datai pengari Direktor Yayasan Sarawak, Suryani Abdul Hamid enggau pengari Pemesai Pelilih Saratok, Pemesai Ngatur Pengawa Sarawak (SAO) Laga Kueh.