Perintah seruran chakah ngembing OKU mujur ba lumba enggau main
SIBU: Perintah nengeri seruran chakah bejalaika pengawa ngembing raban Orang Nyelai Pendiau (OKU) begulai enggau mensia mayuh ke bukai nyengkaum ba pengawa lumba enggau main.
Residen Sibu Hii Chang Kee madah, pekara tu ulih dipeda alai perintah nengeri udah netapka beberapa bengkah pekit ungkup atlet OKU disempulang maya ba Lumba Sarawak (SUKSAR) ke deka diatur bulan Disember tu.
“Tu sebengkah ari chara dikena mai raban tu dipeda bela tikas enggau kitai nyengkaum ba pekit ke diatur begulai enggau atlet ke bukai.
“Kitai ngarapka pengeransing tu ulih ditandu nyentuk ke ila-ila,” pia ku iya madah.
Iya mantaika pekara nya maya dipebasa bejadi Special Olympics Sibu Badminton Games 2017 ba TN Sport, Palan Dagang enggau Pemandang Sibu ditu, kemari.
Sama bela datai maya tu iya nya Mandal Chairman Special Olympic (SO) Sarawak ti mega Chairman SO Sibu Datuk Joseph Ting enggau chairperson komiti pengatur pekit Nasifah Nasir sereta bala bukai.
Pekit ke diatur nya kemari keterubah iya diatur diatur lalu SMK Bukit Assek dipilih nyadi tuai pengatur.
Ba pekit nya, 110 iku atlit ari 11 buah sekula primari enggau lima buah sekula sekondri ti bisi Program Pendidikan Khas Integrasi (Bermasalah Pembelajaran) serata Sibu nyengkaum Kanowit enggau Methodist Care Centre ngambi bagi ba pekit nya.
Nambahka nya iya, Hii madah, pekit badminton nya tau bendar muka runding mensia mayuh alai lumba enggau main nya nyadi chara ke engkeman nempa ulah besepenemu, nyintal kaul bakih enggau deka beserakup.
Ku iya, lumba enggau main baka nya endang digulu atlet Special Olympic iya ke enda enggau sida ti ngembuan penanggul intelektual ba tim ke sebaka.
“Ditu, sida ngena prinsip ke sama iya nya latih enggau bemain begulai.
“Nya alai, kitai meda chara tu ukai semina dikena sida iya aja tang patut bendar dikena kitai lebih agi baka ba sekula serata mengeri Sibu ditu ngambika kitai muntang agi nempa pengidup ti bebasa enggau pangan diri,” ku iya madah baru.
Ba pekara bukai, SUKSAR 2017 deka diatur di Kompleks Sukan Sarawak, Petra Jaya kena 14-17 Disember tu.
Pekit tu ke penudi iya diatur iya nya ba taun 1990 menya.