Raban nembiak di nengeri tu bela diperansang ngulu intebiu soldadu

SIBU: Gerempung Veteran Soldadu Malaysia Negeri Sarawak ( PVTMS) nesau nembiak peranak nengeri tu bela ngulu ‘Pemilihan Awal Terbuka Perajurit Muda Udara Lelaki dan Wanita Siri 58/18’.

Presiden PVTMS Thomas Ling Kui Eng madah, awak tu patut dikena nembiak ditu ti ukai semina nentuka pengidup ti meruan dudi hari tang mega besaup ngemujurka tanggungpengawa ngetanka pengelikun menua.

Iya madah, ba Zon Sarawak, pengawa nya deka diatur di Kem Rascom, Batu 10, Sibu kena 8 Ogos tu enggau di Pangkalan Udara Kuching Kena 10 Ogos.

“Pengawa ngerejister deka belabuh pukul 8.00 nyentuk 8.30 pagi ba endur enggau hari bulan ti udah ditetap.

“Semua dipinta ngena ngepan lumba enggau main, bekasut sereta mai dokumen asal enggau salin diri ke bekaul,” pia ku iya madah.

Sekeda dokumen ke patut dibai iya nya Mykad, setipikit pengada ke baru, setipikit SPM, Diploma enggau salin MY apai enggau indai sereta kereban nulis.

Thomas madah, sida ke patut minta pengawa tu iya nya berumur antar 18 ngagai 25 taun ba 1 Januari 2018, bepengerai sereta nadai penanggul ba pengelansik meda enggau mending.

“Berat tubuh minimum iya nya 405.5 kilogram, tinggi 1.57 meter enggau Indeks Jisim Badan (BMI) di antar 18 ngagai 25,” ku iya nerang.

Penerang silik tau ditanya ngagai Sel Kerjaya dan Pengambilan, Tingkat 7, Menara TH Selborn, 153 Jalan Tun Abdul Razak, 50400 Kuala Lumpur tauka betanya ngagai lumur 03-26812412/2413/2414 tauka meda ba www.airforce. mil.my.

Kelimpah ari nya, Thomas mega tau ditanya nengah lumur 013- 8017056 tauka Penolong Pegawai Tadbir PVTMS (010-9337056/084341935).