Bidang teknikal chukup laku ba dunya kereja
Beduduk ari nya raban graduet patut nyikap diri enggau pengelandik bukai pengudah graduasyen
MUKAH: Bidang teknikal enggau vokasional endang ngembuan pengelaku ba makit dunya kereja kelebih agi di nengeri tu, ku Kepala Menteri Datuk Amar Abang Johari Tun Openg.
Ku iya, graduet patut mupuk nyikap diri enggau pengelandik bukai pengudah graduasyen.
Nitih ku iya, perintah nengeri nengah bemacham pengawa udah bebendar ngemansangka bidang nya nyengkaum ngadaka Wang Turu Gagasan Ekonomi Anak Bumiputera Sarawak (TEGAS).
“Kitai numbuhka TEGAS ngambika anak kitai ulih dikambuh nyadi pengereja pengawa ngembuan pengelandik ke tinggi sereta ngemujurka pemansang Sarawak,” ku iya.
Iya mansutka jaku nya dalam teks jaku ti dibacha Menteri Pelajar, Sains enggau Pansik Teknologi Dato Sri Michael Manyin Jawong rambau Pengerami Konvokesyen Politeknik Mukah (PMU) Ke-10 kemari.
Ukai semina nya aja, perintah mega ku Manyin suah mantu nambahka pengulih makit kereja raban graduet di nengeri tu nengah latih enggau pengelandik.
“Tu ngambika bala nembiak pengudah graduasyen, sida deka bulih kereja enggau nadai penanggul,” ku iya nerang.
Ku iya, tu mega ulih dipeda nyadi pengawa perintah dikena ngangkat sereta ngemanahka tikas pengidup rayat nengah bantu perintah.
Berebak enggau nya, iya mega ngansak raban nembiak enggau rebak baru sedarka peminta nengeri enggau menua tu diatu udah berubah.
“Tu dikena nyikap diri enggau sedia nyingkang ngagai dunya ti moden agi sereta bisi teknologi tinggi enggau ubah ti patut,” ku iya.
Sama bisi bejaku Direktor PMU Abdubrani Yunus sereta mega udah digulu Kaban Kunsil Nengeri ( ADUN) Tellian Yussibnosh Balo.
Berebak enggau nya, bisi 681 graduet nerima diploma ari mayuh macham bidang.
Kitai numbuhka TEGAS ngambika anak kitai ulih dikambuh nyadi pengereja pengawa ngembuan pengelandik ke tinggi sereta ngemujurka pemansang Sarawak. Datuk Amar Abang Johari Tun Openg Kepala Menteri Sarawak