Sebengkah palan ngumpul patut ditumbuh ba sitak tengah Sarawak
BELAWAI: Sapit Kepala Menteri Ketiga Datuk Amar Awang Tengah Ali Hasan deka ngenataika perambu ngagai Kepala Menteri (KM) Datuk Amar Abang Johari Tun Openg ngambika sebengkah palan ngumpul ditumbuh ba sitak tengah nengeri Sarawak.
Berindik ari nya, iya ke mega Menteri Pemansang Mengeri Enggau Pengeraja Asal Kedua ke lalu nyadi Menteri Industri enggau Pemansang Pengawa Dagang milih Tanjung Manis nyadi endur ti semitan ngadaka palan ngumpul nya.
“Aku deka berandau enggau Datuk Amar ( Abang Johari) ngambi ngadaka sebengkah palan ngumpul di kandang menua tengah nengeri Sarawak.
“Kitai endang nemu, iya (Abang Johari) udah ngemendarka sebengkah palan ngumpul di Lawas nangkup peminta di kandang menua Utara, lalu iya mega udah ngemendarka palan ngumpul di Samarahan dikena nangkup peminta di kandang menua Selatan.
“Nya alai, kitai patut bisi abis nadai sebengkah palan ngumpu ungkup sitak tengah Sarawak, lalu menua ti engkeman endar iya nya Tanjung Manis,” ku iya.
Iya mansutka jaku nya lebuh bejaku bejadika Hari Koperasi Negara 2017 Renggat Nengeri Sarawak ngarika Kepala Menteri di Tapak Pesta Kampung Belawai ditu, kemari.
Kaban Kunsil Nengeri (ADUN) Bukit Sari madahka Tanjung Manis nyadi sebengkah palan Hub Halal nengeri Sarawak lalu tau endar dike- mansang.
Nya alai ku iya, perintah nengeri meri pemerat ngagai sektor nanam nyiur, nanas, Kluster Industri Minyak Sawit (POIC), kilang ikan, asil ikan tasik dalam, industri burung walit, pengawa betanam, dagang temuai, nupi ikan enggau udang sereta mayuh ke bukai.
“Tu ti deka dikemerat lalu kitai mega dekaka sida ti deka beranakka puku ditu ukai semina ngaul ba aktiviti ‘hiliran’ aja, tang mega patut ngaul aktiviti ‘huluan’,” ku iya.
Ngelansa Hari Koperasi Negara 2017, ku iya, tuju program nya dikena meri penyedar ngagai rayat senentang pemesai guna koperasi ungkup pemansang menua.
Ku iya, di Sarawak aja bisi 1,002 buah koperasi enggau penyampau tubuh sida ke nyadi kaban manggai 322,881 juta iku, ke alai koperasi tu ngaul diri dalam sektor dagang hartanah, kebun dandang besai, servis, borong renchit enggau dagang temuai.
“Tu nyadi peransang ngagai pengawa kitai nyungkak ekonomi rama komuniti kitai, kelebih agi komuniti di menua pesisir,” ku iya.
Dulu agi ari nya, dalam jaku pengelalu Sapit Menteri Dagang Dalam Menua, Koperasi enggau Orang Bebelika Barang (KPDNKK), Dato Henry Sum Agong madah gempung koperasi di menua tu udah mujur nyapai penambah tu chukup manah dalam taun 2016.
“Ke alai, sepenyampau 13,428 buah koperasi rejista di serata menua enggau manggai kaban 7 juta iku ti ngerikot penyampau jualan enggau bayar nyadi kaban RM13.9 bilion, seraya penyampau aset ngelui ari RM131 biliun enggau penyampau penatai manggai RM40 biliun.
“Tu nunjukka sektor koperasi sebengkah gempung ti besai ari sukut kaul rayat Malaysia sereta ulih nyadi pelasar mantu perintah bejalaika transformasyen pulaika pengelantang rayat,” ku iya.
Sama bisi datai Menteri Muda Pemansang Dagang Mit enggau Jelan Pemesai (PKS) enggau Menteri Muda E- Dagang Datuk Mohd Naroden Majais, Menteri Muda Perambu Mengeri, Pengatur Tanah enggau Rampa Menua Datu Len Talif Salleh, Speaker Aum Kunsil Nengeri (DUN) Datuk Amar Mohamad Asfia Awang Nassar, Menteri Muda ba Opis Kepala Menteri ( Pekara Korporat) Abdullah Saidol, Kaban Parlimen (MP) Tanjung Manis Datuk Norah Tun Abdul Rahman, ADUN Daro Safiee Ahmad, ADUN Balingian Abdul Yakub Arbi sereta bala temuai dipebasa ke bukai.