Pelin transformasyen menua pesisir deka meri pemaik ke rayat
KABONG: Kaban Kunsil Nengeri (ADUN) N40 Kabong, Mohd Chee Kadir madahka pelin pemansang transformasyen menua pesisir ti chakah dipejalaika perintah kemaya hari deka meri ubah ngenyit ngagai komuniti menua pesisir ari semua sukut.
Ku iya, pengawa ke bansa nya mega deka mai komuniti menua pesisir ngejang ari penyeranta sereta ulih besemekih enggau dunya luar ngerebut semua peluang ke bisi dikena ngemansangka diri.
“Nyema kitai beratika kemaya hari, perintah udah ngenegapka pemansang di menua pesisir nengah bejalaika bemacham aktiviti pemansang baka ngemaru sereta ngemanahka sistem infrastruktur ti mungkur penyikap perengka guna bekal ai beresi, bekal elekterik, ngaga jalai sereta ke bukai.
“Semua tu nyengala ngayanka pengeransing perintah ngemansangka menua sereta mai komuniti menua pesisir ngasaika asil ari sukung tegap ngagai perintah Barisan Nasional (BN) ngelama tu,” ku iya.
Mohd Chee mansutka jaku tu rambau Pejalai Ngabas Kampung Emplam enggau Sekula Primari (SK) Kampung Emplam, semak ditu, kemari.
Sama bisi datai Pemesai Pelilih Kabong, Kamaludin Haji Alkap.
Nitih ku Mohd Chee, perintah enda kala enda ibuhka penanggul ditapi peranak dia sereta seruran ngiga jalai mantu sida.
Taja pia ku iya, perintah gawa nengah sekeda atur ti deka begunaka timpuh endur ngemujurka iya.
“Diatu agih belanja udah bisi, semina tinggal ngatur pejalai semua pengawa nya.
“Pemansang dipejalai berenggat ba sekeda endur laban ditu bisi mayuh menua patut diberi perati. Nyema bisi pengelaun ukai reti perintah enda ibuhka pengelantang rayat di menua nya,” tandu iya.
Berebak enggau pejalai nya, Mohd Chee mega ngemendarka agih belanja penyampau RM1,150,000 ngagai peranak Kampung Emplam ungkup aktiviti pemansang di kandang menua nya.
Agih belanja ti diberi dike- na ngaga dinding penebat ngelingi kandang SK Kampung Emplam penyampau RM200,000, dikena ngaga parit padang sekulaRM200,000, RM200,000 da agi ungkup taba balai lalu RM350,000 dikena ngaga sebuah balai dia, seraya ke bukai, RM200,000 dikena ngemanahka jalai di genturung pendiau nya.