Mensia mayuh ngandal JPBN ulih mutar pengelekai rabies

SIBU: Mensia mayuh ngembuan pengandal ngagai Komiti Mutar Penusah Ngenyit Nengeri ( JPBN) ulih ngatur pengawa nagang sereta munaska pengelekai penyakit rabies ba nengeri tu.

Kaban Kunsil Nengeri ( ADUN) Dudong Datuk Tiong Thai King madah, perintah nengeri nengeri nengah komiti nya udah mujur mutarka penyakit nya enggau manah naka ke diatu.

“Kitai pechaya komiti ti betuaika Sapit Kepala Menteri Datuk Amar Douglas Uggah Embas tu ulih ngaga pengawa dikena ngemunaska penyakit rabies tu.

“Pia mega kitai di Sibu ditu meseti pechayaka komiti tu taja ditu penyakit nya nadai dirikodka nyadi,” pia ku iya madah.

Iya bejaku munyi nya maya bejadi Program Penyedar Penyakit Rabies di Dewan Suarah Sibu ditu, lemai kemari.

Sama bela datai maya tu iya nya Residen Sibu ti mega Chairman Komiti Mutar Penusah Ngenyit Sitak Sibu Hii Chang Kee, Direkter Sepital Sibu Dr Ngian Hie Ung, Pemesai Opis Pengerai Sibu Muhamad Rais Abdullah sereta bala bukai.

Tiong ti mega Chairman Kaunsil Sibu (SMC) maya tu madah, dalam kandang bulan Julai aja piak sida udah mujur nangkap 180 iku uduk lelang.

Ku iya, pengawa nya deka semampai ditandu ngambika penyampau uduk lelang tu ulih dikurangka agi ba mengeri Sibu.

“Kelimpah ari nya, mensia mayuh anang enda nyaga uduk sida enggau manah lalu anang ngelakka iya bejalai ke bukai.

“Kebuah pia laban kitai deka nyeliahka kes diketup ukui nyadi ditu,” ku iya madah baru.

Bekaul enggau program nya, iya madahka program nya engkeman amat diatur ngambika mensia mayuh ngembuan penemu ke bekaul enggau nemu nama bagi penyakit rabies.

“Penemu baka tu beguna amat dikembuan kitai mayuh taja pan kitai di Sibu ditu,” pia ku iya madah.

Ba program tu mensia mayuh mendingka licha ari Opis Veterinar enggau Opis Pengerai.

Sida mega diberi awak betanya bekaul enggau penyakit rabies.