Video tempa nembiak SK Long Sepiling menang ACPM di Jipun

KUCHING: Video ‘ The Power of Hands’ asil tempa nembiak Sekula Primari (SK) Long Sepiling, Baram menang Anugerah Cherita Pemadu Manah (ACPM) ba Kid Witness News (KWN) Sidang Kemuncak Global 2017 di Tokyo, Jipun kemari.

Video dalam Jaku Kayan enggau Iban pengelama 4 minit 54 siken ngelansa nama kebuah mensia patut sayauka jari, pemeri Tuhan ti pemadu berega, mujur ngalahka bala pemekit ari 18 bengkah menua ke bukai.

Lebuhka dirandau Bernama, pengajar matematik SK Long Sepiling, Muhammad Saffuan Jaffar madahka video nya asil ari penemu empat iku nembiak iya nya Anilov Fabien Tingang, 13 taun, Juwita Ulean, 12 taun, Fiona Fredick, 12 taun, enggau Michael Nyamun, 11 taun, lalu dibantu pengajar sekula nya.

“Aku berasai gaga enggau temegah ati laban kami ( pengajar) di menua ulu mujur ngangkatka nembiak di menua ulu mega bisi penau duduk sama baruh, bediri sama tinggi, sama tikas enggau nembiak di mengeri, lalu sida mega ulih ngemai nama menua tebilang ba tikas antarabansa.

“Nengah komentar akim, tim nya mega bulih penemu baru nengkebang video dudi hari, akim dekaka video ti ditengkebang patut bisi ‘mesej’ ti nyata, global enggau nengah penemu dibantaika nembiak mit,” ku iya ti bela nyempulang ngagai Tokyo begulai enggau pengajar Sains sereta Jaku Melayu, Fadhli Ab Salam.

SK Long Sepiling bisi semilan iku nembiak enggau 11 iku pengajar (nyengkaum kepala pengajar) di Pelilih Mit Baram, pejalai napatka sekula ngena bot ekpress pengelama tiga jam ari Marudi.

Rambau pengawa nyuaka anugerah nya, Michael ti ngarika tiga iku bakih iya ke bukai, nerima trofi enggau setipikit penyereta ti disuaka Duane Paul Kale of International Paralympic Committee Governing Board.

Ngelansa pasal video nya, Muhammad Saffuan madah pengawa nengkebang video nya berengkah ari tengan bulan Ogos 2016 pengudah bala nembiak pulai ari KWN Training di Nilai, Negeri Sembilan, lalu udah nya sida menang ba pekit renggat nasional dalam bulan November 2016. — Bernama