Urung 200 Agropreneur Biak ari sitak Mas Gading nyereta Bengkel Nupi Kelulut
BAU: Urung 200 iku orang dagang biak tauka Agropreneur Biak ari sitak Mas Gading udah nyereta Bengkel Nupi Kelulut ti keterubah diatur ba pelilih menua nya, kemari.
Nitihku Direktor Indu Opis Palan Promosyen enggau Pemansang Pengawa Dagang MARDI, Hassan Said, bengkel ke diatur MARDI kenyau ari taun 2014 dikena mansik enggau ngerembaika teknologi dalam bidang be- tanam betupi.
Bengkel nya ke diatur Palan Pansik enggau Pemansang Betanam Betupi Malaysia (MARDI) Sarawak enggau juluk deka bekunsi penemu pasal chara nupi kelulut ari pakar MARDI seraya ngelatih orang dagang baru ngemeranka industri nya.
“Bengkel tu keterubah dia atur di Bau, lalu objektif diatur dikena meri penemu enggau penerang pasal chara nupi kelulut, belajar ngelala bansa kelulut ke ulih dijual, bekunsi penerang pasal pemesai guna madu kelulut sereta pemanah ngagai pengerai lalu keempat objektif diatu kitai deka nempa orang dagang baru lebih agi Agropreneur Biak.
“MARDI ti diberi tanggungpengawa bejalaika pengawa pemansik sereta mindahka teknologi, seruran ngerembaika teknologi ke ulih mutarka penanggul industri betanam betupi nyengkaum nupi kelulut.
“Udah nyadi tanggungpengawa MARDI nentuka industri nupi kelulut nengah program Agropreneur Biak seruran ngerembai sereta nyadi ikon nengeri Sarawak,” ku iya dalam jaku pengelalu.
Pengerami Bengkel Nupi Kelulut nya udah mujur dipenyadika Sapit Menteri Betanam Betupi enggau Industri Asas Tani ke mega Kaban Parlimen Mas Gading, Datuk Nogeh Gumbek.
Di Sarawak, MARDI ngatur beberapa aktiviti enggau inisiatif baka projek pengeluar madu kelulut, ngambika industri nupi kelulut ulih maju.
“Kitai bisi bejalaika projek rantaian berkala madu kelulut, lalu kami bisi 98 iku pesereta ke lalu bisi urung 4,000 lot ti dipelabaka ngasilka urung setan bekal madu kelulut sebulan.
“Asil projek tu kita deka proses sereta kualiti madu ditentuka MARDI lalu dijual ngena chap MARDI.
“KItai ngarapka industri tu ngerembai maju di Sarawak lalu ulih nempa orang dagang baru dalam industri penternakan kelulut,” ku iya seraya madahka Sarawak bisi ladang chunto iya nya ba stesyen MARDI Saratok ke ulih endur praktikal nyema deka ngemeranka industri nya.
Di Sarawak naka ke diatu bisi 132 iku kaban Agropre- neur. Lalu naka bulan Julai 2017 bisi 21 iku penerima In Kind Contribution (IKC) enggau penyampau geran RM216,775.
Nyerumba pengerami nya kemari, MARDI bisi nyuaka 11 geran IKC Unit Agropreneur Muda Opis Menteri Betanam Betupi enggau Industri Asas Tani ngagai orang dagang biak ke dipilih di peleih menua Bau, dikena ngemanahka projek ke udah dipejalaika.