SMK Engkilili nguasa Pekit Pidato Iban UBAEDIL 2017 kategori Sekula Sekondari
KUCHING: SMK Engkilili nguasa Pekit Pengelandik Bejaku (Pidato) Iban UB-AEDIL 2017 ungkup kategori Sekula Sekondari ba renggat final ke diatur di Auditorium Tun Ahmad Zaidi Adruce ( TAZA), Palan Pematih Pengajar(IPG) Kampus Batu Lintang ditu, kemari.
Pengari sekula nya Tracy Layau Anak William Dambol ,19, enggau Jasmine Lyne Anak Jap ,19, bulih penuduk lumur satu enggau dua lalu nerima perais mata duit RM1,500 enggau RM1,000 beserata tropi enggau setipikit.
Ba pidato nya, Tracy ti mantaika batang jurai ‘Lumba enggau Main’ mujur bulih ‘ poin’ pemadu mayuh ari raban akim ti betuaika Harold Unsie ari Gerempung Pemansang Pelajar Jaku Iban (AEDIL).
Enda ngadang tau bulih gelar champion ba pekit pidato jaku Iban ti keterubah diatur nya, Tracy ke penatai asal ari Marup, Engkilili madah semua nya asil pengerindu iya ba pengawa pidato.
“Aku berasai gaga ketegal mujur bulih gelar champion ba pekit tu. Tu mih keterubah aku enggau bepekit kelebih agi luar ari menua diri.
“Aku rindu sereta teleba bejaku ba mua bala mayuh. Ajar enggau peransang ari pengajar mega udah mayuh mantu,”ku iya lebuh dikerandau tembu pengawa kemari.
Bela bekunsi pengaga, Jasmine madah seduai (Tracy) bela bekunsi penemu, nyendia buah runding dikena napi pekit.
Ku iya ke penatai asal ari San Semanju, Engkilili, timpuh kurang ari seminggu diguna endur nyendia semua batang jurai ti deka dibantai.
Jasmine ti mantaika batang jurai ‘Ngetanka Daya Idup Bansa” madah deka majakka pengawa bepekit pidato jemah ila.
Seduai ngenataika jaku puji ngagai Pengajar John Empenit (Pengiring) enggau Pengajar Shirley Sian Jampong ti udah mayuh meri ajar enggau bantu.
Penuduk lumur tiga ungkup kategori ke sama pulai ngagai Marlia anak Kilat ari SMK Song ke alai iya nerima perais mata duit RM500, tropi enggau setipikit.
Pekit mega nyendia perais pengaga ati penyampau RM200 ngagai pemekit ke bulih lumur empat ngagai enam.
Penuduk lumur empat pulai ngagai Jessica Cherenny Anak Nelson (SMK BM Saratok), Debra Simoi (SMK Melugu) ba penuduk lumur lima lalu Andriana Miloh Anak Bugie ( SMK Song) ba penuduk lumur enam.