Pekit Pidato Iban patut diatur renggat nengeri
Tu ngayanka penyiru lebih agi bansa Iban sentang pemerat ngenanka adat enggau main asal diri
KUCHING: Menteri Muda Nembiak enggau Lumba Snowdan Lawan dekaka Pekit Pengelandik Bejaku (Pidato) Iban diatur ungkup renggat nengeri dudi hari.
Bejaku rambau ngarika Sapit Kepala Menteri Tan Sri Datuk Amar Dr James Jemut Masing ke alai iya bejadika Pekit Pidato UB- AEDIL 2017 kemari, Snowdan madah pekit dipasuk pemekit ke datai ari serata Sarawak.
“Aku berati, semua kategori ba pekit tu dipasuk pemekit ke datai ari serata nengeri.
“Pekit tu chukup manah. Pemekit ari ketegori sekula sekondari, palan pelajar tinggi enggau kategori tebuka chukup landik bejaku ba mua mayuh.
“Pekit ke baka tu meseti diatur ninting taun lalu ba taun ti deka datai gaga besai agi, lalu diatur ungkup renggat nengeri,”ku iya.
Dikena nentu sereta meri sukung ngambi pekit diatur baru ba taun baru, Snowdan ke mega ADUN Balai Ringin madah deka meri agih belanja penyampau RM10,000 ungkup tuju nya.
Pekit diatur Utusan Borneo (UB) nengah kerejasama Ger- empung Pemansang Pelajar Jaku Iban (AEDIL) lalu diatur di Auditorium Tun Ahmad Zaidi Adruce(TAZA), Palan Pematih Pengajar (IPG) Kampus Batu Lintang.
Ngenang kaul ke sama, Snowdan mega ngenataika puji ngagai semua komiti pengatur Pekit Pidato Iban UB-AEDIL 2017.
Ku iya, pekit tu nyata ngayanka penyiru semua kelebih agi bansa Iban sentang pemerat ngenan sereta ngerembai adat enggau main asal bansa diri.
Pengawa tu ku iya ukai semina dikemeran di rumah panjai tang mega patut dikemeran ba kandang mengeri.
“Dipeda aku sehari tu, pemekit landik bepantun, bedungai, besampi, nimang enggau main asal kitai bansa ke bukai.
“Kitai meseti ngenanka main asal lalu tu mih ku kitai ‘Dikelala buah ari langgu, dikelala bansa ari jaku’pemekit chukup landik, chukup manah,”ku iya.
Ngenang kaul ke sama, Chairman Pekit Churchill Edward Drem ba jaku pengelalu madah ba taun baru ila pekit deka nyendia kategori baru iya nya kategori veteran.
Ku iya, kategori veteran nya dikearap ulih ngerami sereta matak mayuh agi pemekit kelimpah nambah pemanah pengawa ke bisi disedia pekit.
Bela datai Ketuai Editor Utusan Borneo Sulaiman Bujang, Mandal Presiden AEDIL Graman Ringi , Menijar See Hua (Kuching) Wong Sing Seng, Sekretari pekit Mathias Kasap enggau ke bukai.
Pekit ke baka tu meseti diatur ninting taun lalu ba taun ti deka datai gaga besai agi, lalu diatur ungkup renggat nengeri. Snowdan Lawan Menteri Muda Nembiak enggau Luma