Peneleba nyereta pekit pidato mayuh mantu Martin Dinil begelar champion
KUCHING: Pekit Pengelandik Bejaku (Pidato) Iban UB- AEDIL 2017 kemari ngangkatka Martin Dinil ari Miri bulih gelar champion ba kategori Tebuka Baruh 45 taun ke diatur di Auditorium Tun Ahmad Zaidi Adruce ( TAZA), Palan Pematih Pengajar (IPG) Kampus Batu Lintang ditu, kemari.
Enggau pemutus nya Martin ,31, ngalahka enam pemekit bukai lalu nerima perais mata duit RM2,000, tropi sereta setipikit.
Datai jauh ari Miri ketegal ti deka enggau bepekit di Kuching, Martin madah sigi ngadang deka napi bala pemekit bukai ke sama bela landik ba pengawa bejaku ba mua bala mayuh.
“Aku sigi udah ngadang pekit deka disereta raban orang ke landik bejaku ba mua bala mayuh lalu nya amat baka ke dipeda kitai sehari tu.
“Tajapia aku udah nyendia diri enggau manah lalu udah nguji tauka mantaika batang jurai enggau naka pemanah,”ku iya lebuh dikerandau tembu pengawa kemari.
Ku iya nambah, timpuh tiga hari udah dikena endur iya nyikap diri enggau buah runding ngambi tau dibantai lalu didinga raban akim ari Gerempung Pemansang Pelajar Jaku Iban (AEDIL).
Tajapan kiruh ketegal tanggungpengawa ba seiti kompeni di Miri, pekara nya nadai meri penanggul ba Martin ketegal ti sigi rinduka pengawa pidato.
Martin ti mantaika batang jurai ‘Adat enggau Main Asal’ kemari kala menang pekit Pidato 1Malaysia nguna jaku Malaysia renggat Kebangsaan ke diatur di Negeri Sembilan ba taun 2012.
Dulu agi ari nya ba taun ke sama iya menang pekit pidato renggat nengeri ti ngujungka iya dipilih bepekit ba renggat Kebangsaan.
Ngenang kaul ke sama, Martin meri jaku puji ngagai Utusan Borneo (UB) enggau AEDIl ketegal ti udah ngatur pekit kemari.
“Pekit pidato jaku Iban tu chukup manah lalu patut diatur ninting taun. Pengawa tu nyaup ngerembaika jaku Iban ngambi manggai ba ikas ke tinggi agi,”ku iya.
Penuduk lumur dua enggau tiga ungkup ketagori Tebuka Baruh 45 taun pulai ngagai Sangin Juat enggau Suda Lunyong.
Seduai nerima perais mata duit RM1,500 enggau RM500, tropi besereta setipikit .
Tiga iku pemekit ke bulih lumur empat, lima enggau enam iya nya Sila Robin, Tini Numpang enggau Bruwin Jumput bela nerima perais pengaga ati RM200 sereta setipikit.
Ba pekit ke sama ungkup kategori Palan Pelajar Tinggi (IPT) gelar champion pulai ngagai Micheal Bandang Tinggai lalu iya nerima perais RM2,000, tropi sereta setipikit.
Penuduk lumur dua enggau tiga pulai ngagai Brolin Golayous enggau Nicholas Beliang Engkabi. Seduai nerima perais mata duit RM1,500 enggau RM500, tropi sereta setipikit.
Tiga iku pemekit kategori nya ke bulih penuduk lumur tiga, empat enggau lima iya nya Erica Lenya, Easter Jawai enggau Lee Roy Garret nerima perais mata duit RM200 sereta setipikit.