Tiga iku raban PBK ti ngaga gempuru likun ditanka polis
SIBU: Parti Bumi Kenyalang (PBK) enda lantang ati meda tiga iku raban sida ditanka polis sepengudah ngaga gempuru likun di Sibu enggau Sarikei kena 20 Ogos tu tadi.
Sapit Chairman PBK Lim Chan Pheng madah, raban sida ke disil polis semalam tu iya nya Chairman PBK Lanang Johnny Ting, Sapit Chairman PBK Lanang Siew enggau Sekretari sida Franky Anong.
“Kebendar nya pengawa begempuru tu diatur enda lebih ari lima iku raban parti kami, ke endang nitihka undang-undang.
“Tang penyampau tubuh dipeda mayuh maya nya laban orang luar bela datai enggau sida laban nyukung pengawa ke digaga nya.
“Udah di Sibu, hari seiti (21 Ogos) sida ngaga pengawa ke sebaka di Sarikei ke bela digulu Chairman PBK Sarikei Wong Ching King.
“Tengahari nya, sida nerima kangau telefon ari opis polis Sibu minta sida ke opis nya lalu ngaga penerang bekaul enggau pengawa ke digaga,” pia ku iya maya aum media ditu, kilah ensana.
Ku Lim, berengkah tengahari nyentuk lemai sida tiga nya ditan polis lalu dikemendarka pansut nangkan ke nya sebedau opis polis nya nerima jaku tangkan ari piak ke besai agi ngasuh sida tiga dikangau baru lalu disil semalam.
Iya madah, tuju pengawa begempuru ke diatur maya nya laban deka nerang ngagai mensia mayuh sentang penumbuh menua Malaysia ke bendar, nangika peranak menua Sarawak tu empu majak salah penemu sentang sejarah ke enda amat.
Maya gempuru likun nya, Franky enggau bala iya bisi mai banner ke ditulis ‘Say No To 831’, ‘No Tourism Tax’, ‘Establish Commersial Bank of Sarawak’ enggau ‘No GST’.
Nambahka nya, Franky mega bisi madah, kelimpah disil ketegal begempuru nya, iya disil laban sebengkah penerang ke ditulis iya ba Facebook sebedau tu.
Ku iya, ba dia, iya ngaku diri saru nulis ‘Sarawak Crime Minister Abang Johari’ ti patut ditulis iya ‘Sarawak Prime Minister Abang Johari’.
“Aku mega ngarapka piak polis ulih lengkas mulaika baru telefon aku ke ditan sida laban ba dia mayuh penerang ke diguna aku,” ku iya sambil madah sida enda nyalahka polis ditu bejalaika pengawa sida.
Taja udah disil semalam, Franky madahka pengeransing piak sida mai peranak menua Sarawak nemu sejarah asal diri empu enda puntan lalu deka semampai ditandu belama.
“Kami deka ngatur pengawa begempuru likun kena 16 September enggau 24 September ti deka datai,” pia ku iya madah.