Peranak ke ari baruh pegai MPP dilalau mayar chukai pintu

PADAWAN: Chairman Opis Kunsil Kandang Padawan (MPP) Lo Khere Chiang ngelalau peranak ke diau ari baruh pegai opis kunsil nya mayar chukai pintu.

Ku iya, duit asil chukai pintu ke dikumpul ari pemayar chukai deka dipulaika baru nengah chara nyendia servis ke diguna.

“Chukai pintu nyadi bengkah penatai pemisi ke pemadu besai ungkup opis kunsil lalu dikena melanja semua ungkus operasyen.

“Ungkup opis kunsil ke besai baka MPP, chukai pintu ngenataika 60 nyentuk 70 peratus ngagai pemisi MPP ke alai MPP sigi ngarapka penatai pemisi ari chukai pintu tu,’ku iya.

Lo mansutka jaku nya ba pengerami ngintu genap 21 taun MPP ke diatur di Laman Begunan MPP ditu, kemari.

Pengerami dikemujur Menteri Opis Kunsil Kandang Menua enggau Pengawa Berumah Datuk Dr Sim Kui Huan.

Iya nambah, pengawa ngintu pemanah jalai, nebas rumput, ngelasi parit enggau ngambi uras entara bengkah pengawa ti begunaka belanja besai.

“Semua asil chukai pintu sigi dikena nyendia servis tu lalu dikearap ulih ngelantang sereta ngangkatka ikas pengidup rayat,’ku iya.

Ngenang kaul bukai, Lo madah MPP udah nyendiaka servis aplikasyen WhatsApp.

Aplikasyen nya ku iya, deka meri awak ngagai mensia mayuh meri penemu enggau timbal sentang servis ke bisi disedia MPP.

Iya mega madah MPP diatu udah bisi raban ke dikumbai ‘Traffic Warden’ ti deka nyaup polis trafik ngintu pengelikun pejalai trafik ngelingi kandang endur ke dikuasa MPP.

Ba pengerami kemari, Lo bisi nyuaka setipikit “Anugerah Perkhidmatan Cemerlang’(APC) ngagai sekeda orang gawa MPP.