PPD deka diberi kuasa ngaga pemutus bekaul pelajar
KUCHING: Opis Menteri Pelajar Malaysia (KPM) deka meri kuasa ngagai Pemesai Opis Pelajar Pelilih Menua (PPD) di serata menua ngaga sekeda pemutus ke patut bekaul enggau pelajar nengeri.
Menteri Pelajar Malaysia Dato Seri Mahdzir Khalid madahka nya sebengkah chara dikena ngenegapka agi pelajar nengeri enggau Pemesai Opis Pelajar Pelilih Menua (PPD).
Kebuah pia ku iya, nya dikena meri peluang enggau kuasa lebih ngagai PPD ngambika ulih ngaga sekeda pemutus tauka penerang lalu enda kelalu bepanggai ngagai renggat KPM.
“Seiti ari pekara ke nyadi buah mulut pegawai renggat pelilih menua tu iya nya utai ke dikumbai kitai ngenegapka pelajar nengeri enggau PPD.
“Enti tu ulih dipejalaika enggau manah, reti nya bisi pekara ke ulih diputarka ba renggat PPD tau enda ibuh dikenataika ngagai renggat pusat (KPM).
“Ambika sema ular man- tuk nembiak, enda ibuh mih menteri bejaku laban PPD aja pan ulih bejakuka nya, laban sebedau tu semua pekara dilempai ngagai Putrajaya, tang ke bendar sekeda pekara nya tau enda ibuh dibai ngagai renggat perintah besai,” ku iya seraya madahka nya pekara ti dibantaika dalam Pesidangan Kebangsaan Pengurusan Pendidikan PPD 2017.
Mahdzir mansutka pekara nya ngagai raban pengarang berita sebedau ke ngulu aum betambit pintu, Persidangan Kebangsaan Pengurusan Pendidikan Pegawai Pendidikan Daerah 2017, Mesyuarat Agung MPPDM Kali Ke-19 ba sebuah hotel ditu, malam ensanus.
Pekara bekaul enggau nyiri pangku pengawa mega entara ke dikerandauka dalam aum tu, ku iya.
Taun tu Sarawak dipilih nyadi tuai rumah endur ngatur aum nya ti berambai jaku ‘Program Transformasi Daerah (DTP): Memperkasakan Pembelajaran Abad Ke-21’ , ti diatur bahagian Pengurusan Sekolah Harian (BPSH), Opis Menteri pelajar malaysia (KPM) begulai enggau Majlis Pegawai Pendidikan Daerah Malaysia (MPPDM).
Bisi 142 iku PPD serata Malaysia ngulu aum ke diatur tiga hari berunggu, 23 ngagai 25 Ogos tu.
Objektif aum nya, ngenegapka Program Transformasi Daerah (DTP) ke nyadi inisiatif besai PPM; ngenegapka PPD nyadi ket- uai DTP, ngenukuka semua sekula ngemeran sereta ngemeratka PAK21 enggau ngenegapka atur PPD nuju ‘ kemenjadian’ nembiak ti mungkur semua pekara.
“Aum tu amat beguna ngagai pegawai PPD berandauka pekara ti bekaul enggau polisi ba renggat opis menteri, proses ti dipejalaika bekaul enggau pelajar ke nitihka lalau National Education Blue Print.
“Nya alai tetiap PPD dalam Malaysia bisi juluk ke diri empu bepelasarka rampa menua tauka geografi ba kandang endur diri, sida bisi juluk ti udah ditetapka ti dikanggau ‘kemenjadian’ nembiak,” ku iya seraya madahka nya pekara ke ulih dipekunsika.
Kelimpah ari nya, pekara ti dipekuh sereta dikerandau bekaul enggau pengawa ngajar enggau belajar, chara ti pemadu engkeman dipejalaika dalam kelas ba Abad Ke-19, Kemahiran Berfikir Aras Tinggi (KBAT) enggau pemar sereta penanggul ke ditapi baka penanggul nembiak, ku iya.