Ubah runding sereta ulah ngambika ulih meri servis ke bekualiti: Dr Sim
PADAWAN: Ikas pengawa ke diadu Opis Kunsil Kandang Padawan (MPP) patut manah agi ari ikas pengawa ke digaga Opis Kunsil Pelilih Menua Pesisir Kuching (KRDC), Ku Menteri Opis Kunsil Kandang Menua enggau Pengawa Berumah Datuk Dr Sim Kui Huan.
Berindik enggau nya iya ngansak semua orang gawa ba MPP ngubah runding sereta ulah ngambi ulih nentuka MPP meri servis ke bekualiti ngagai rayat.
“Chukup beguna amat, MPP ke nyadi anak KRDC patut manah agi ari KRDC. Tu mih juluk kitai lalu aku deka meri sukung.
“Diatu runding kitai enda tau enda diubah, ari runding meri servis ikas pelilih mit ngagai runding meri servis ikas mengeri,’ ku iya.
Dr Sim mansutka jaku nya ba pengerami ngintu genap 21 taun MPP di Laman Begunan MPP di Padawan, kemari.
KRDC ditumbuh ba taun 1957 lalu diubah nama nyadi MPP kena 1 0gos 1996.
Ngenang kaul ke sama, iya ngelalau semua orang ke bisi kaul enggau MPP nyengkaum raban kunsilor ngadu randau lalu nentuka kuing MPP.
Iya minta semua berundingka pengawa ke patut dipejalai ungkup pemaik komuniti sereta dikena nangkup tanggungpengawa meri servis ikas mengeri jemah ila.
“Dalam timpuh 5 taun tu, aku deka ngaga ubah ba opis kunsil. Dikena nyapa juluk nya, kitai deka nguna teknologi moden baka ke CCTV enggau dron.
“MPP mega deka nempa kerejasama rat enggau opis kunsil bukai, ejensi perintah bukai sereta mensia mayuh.”
Ba pengerami kemari, iya bisi ngelanchar apliskasyen WhatsApp MPP enggau Logo MPP ba Papan Tanda Jalai.
Bela datai Chairman MPP Ir Lo Khere Chiang enggau Sapit Chairman Datuk Ahmad Ibrahim.