Claudya napi penanggul tusah enseput, begunaka bantu belanja
SIBU: Nadai apai indai ketegal ti udah sarak, seiku nembiak ke baru berumur 10 bulan ti benung diperubat ba Sepital Miri diatu nyau udah ditinggalka indai ti dikeandal ngintu, ngibun sereta ngemesai.
Claudya Ericka Yana ke dipadah lutur sepital nya napi penanggul tusah enseput nyangka bekenaka oksigen nangkan ke tu ila ti endang bekenaka mayuh belanja.
Diatu mega Claudya semina ngandalka aki enggau ini ngibun iya diau ba langkau mit sida ba belakang Hotel Telang Usan, Miri.
Ukai semina sida tiga meaki aja diau ba langkau nya tang mega bisi tiga iku bala anak aki enggau ini iya ke bukai ke diatu benung besekula Pom 2, Primari 2 enggau ke seiku agi baru tiga taun.
Pemakai enggau belanja endang ngarapka gaji aki iya bekuli ba mengeri Miri, urung RM600 sebulan.
Penyuntuk belanja balat agi diasaika sida sebilik udah tu bepun ari Claudya bekenaka belanja berubat nyengkaum bekal oksigen.
Beratika penusah ke ditapi Claudya tu, raban Dayak Think-Tank (DTTG) Pampang Miri betuaika sapit chairman sida, Philip Asry datai nyuaka tulung ari sida, lemai kemari.
Kelimpah sida, Kaban Parlimen Miri Dr Micheal Teo mega beguai datai maya nya, nyuaka saup ari iya.
“Kitai berasai sinu amat meda penusah enggau tating pengidup ke ditapi Claudya tu.
“Kitai andal amat piak baka Opis Pengintu Pengelikun Mensia Mayuh Miri ulih datai enggau lengkas meri bantu ke chukup ngagai Claudya sebilik tu,” pia Philip Asry maya nya.
Philip mega andal mensia mayuh baka raban korporat tauka piak bekaul ke bukai bela mantaika penyinu ngagai penusah pengidup ke bisi nyadi ba nembiak nya.
Mensia mayuh ke deka meri bantu ngagai Claudya tu tau nanya ini iya, Sarinah Mat nengah lumur 013-845 8744.