JKNS, JBPM udah nyain MoU dikena ngenegapka servis sida
KUCHING: Opis Pengerai Nengeri Sarawak ( JKNS) ngenegapka servis Perubat Sebedau Datai Sepital enggau Ambulans nengah pengawa nyain sempekat pemereti ati (MoU) enggau Opis Bomba enggau Penyah Penusah Malaysia (JBPM), kemari.
Direktor JKNS Dr. Jamilah Hashim madahka, Perubat Sebedau Datai Sepital nya ditumbuh sereta dipejalaika Opis Menteri Pengerai Malaysia ( KKM) kenyau ari taun 2013 sereta dipejalaika bererenggat lalu di sarawak berengkah dikemeranka taun 2017.
Nitihku iya, ujung bulan Disember 2016 KKM minta opis pengerai nengeri nempa kerejasama enggau bomba dikena ngenegapka pengawa Perubat Sebedau Datai Sepital, lalu renggat Sarawak aum enggau bomba pasal pekara nya diatur bulan Januari 2017.
“Perubat Sebedau Datai Sepital iya nya servis dulu ngubat pesakit ti dipejalaika di luar sepital tauka ba endur penusah ngenyit nyadi dikena ngurangka morbidity enggau mortality sebedau pesakit datai ba fasiliti pengerai.
“Nya alai dikena ngenegapka servis Perubat Sebedau Datai Sepital tu, taun tu ari bulan Januari ngagai Februari kami (JKNS) udah meri latih ngagai 73 iku raban Bomba pengelama 20 hari ngena lima pekara dalam modul nya, udah nya sida dianjung ngagai lima buah sepital sereta patut nembuka 120 jam,” ku iya dalam aum pengarang berita.
Dulu ari nya Dr. Jamilah ngarika JKNS nyain MoU Pengawa Raban Bomba enggau Servis Perubat Sebedau Datai Sepital enggau Ambulans Opis Pengerai Nengeri Sarawak enggau JBPM Sarawak ti diatur ba sebengkah hotel ditu, kemari.
Ngenang pasal ambulan JKNS, Dr Jamilah madahka ba bagi menua Kuching - Samarahan bisi 24 buah ambulans sereta 17 buah ambulans di bagi menua Miri, lalu tetiap buah ambulans bisi seiku penolong pemesai perubat, misi enggau deriba.
Berebak enggau tu iya madahka, Pusat Panggilan Kecemasan (MECC) Kuching ba taun 2016 bisi nerima 8,600 kanggau penusah ngenyit lalu dalam taun 2017 naka 31 Julai bisi 6,277 kanggau.
MECC Miri ba taun 2016 bisi nerima 2,455 kanggau penusah ngenyit lalu dalam taun 2017 naka 31 Julai bisi nerima 1,462 kanggau.
Kelimpah ari nya, dalam aum pengarang berita ke sama, Direktor JBPM Sarawak Nor Hisham Mohammad madahka, bomba Sarawak bisi 21 buah ambulans ke diengkah ba balai bomba.
“Nengah MoU tu jemah ila, nyema kami begunaka ambulans sepital dia piak nya deka nyendika kami, lalu pia mega nyema piak sepital begunaka kami besedia ba sepital, kami mega deka besedia,” ku iya ti ngarika bomba Sarawak nyain MoU nya.
Sama bisi datai ngagai pengawa nya kemari Ketuai Direktor JBPM Datuk Wira Mohd Nor Ibrahim; Pemantu Ketuai Direktor Unit Operasi Bomba enggau Penyelamat, Edwin Galan Teruki.