PRS udah sedia napi PRU14
Parti udah sedia napi rayat lalu arap bendar ulih menang ba semua sitak parlimen ke diungkup ngagai parti
KUCHING: Parti Rakyat Sarawak (PRS) nadai penanggul sereta udah sedia napi Pengawa Bepilih Besai Ke-14 (PRU 14), sekalika diatur taun tu tauka 2018.
Presiden PRS ti mega Sapit Kepala Menteri, Tan Sri Datuk Amar James Jemut Masing madah, parti nya udah sedia betemu enggau rayat sereta arap bendar ulih menang ba semua sitak parlimen ke diungkup ngagai parti.
“Taja pia, aku enda nemu sekalika PRU 14 deka diatur ba taun 2017. Tu bepanggai ba Menteri Besai, enti iya ngasaika 2017 sama engkeman enggau 2018, iya ulih ngerah pengawa bepilih taun tu.
“PRS udah besedia betunga mua enggau rayat. Kami arap bendar ulih ngetanka enam sitak enti disiplin dijaga dalam parti, nadai sabotaj lalu semua parti Barisan Nasional (BN) nulung pangan diri,” ku iya madah nengah aplikasyen WhatsApp ngagai Utusan Borneo.
Ba renggat parlimen PRS bisi enam sitak iya nya Julau, Selangau, Sri Aman, Lubok Antu, Kanowit enggau Hulu Rajang.
Parlimen Julau diatur diari- ka Datuk Joseph Salang Gandum; Selangau (Datuk Joseph Entulu); Sri Aman (Datuk Masir Kujat); Lubok Antu ( William Nyalau Badak); Kanowit (Datuk Aaron Ago Dagang) enggau parlimen Hulu Rajang diatu diarika Datuk Wilson Ugak Kumbong.
“PRU 14 deka nyadi pe- nentu ngagai perintah BN di menua tu. enti BN menang, parti penyakal tau ngiling tikai, lalu pulai,” ku iya.
Di Kuala Lumpur, ensanus ba sebengkah aum parti UMNO, Menteri Besai ti mega Presiden parti nya, Datuk Seri Najib Tun Razak madahka pengawa nyikap semua raban bepilih parti napi PRU 14 benung chakah dipejalaika lalu PRU 14 tau diatur sebarang maya.
“Nyema bisi PRU 14, kitai deka nangguhka aum besai UMNO ti deka diatur kena 5 ngagai 9 Disember tu ila,” ku iya ba aum pengarang berita pengudah nyadi chairman aum Majlis Tertinggi (MT) parti nya di Menara Dato Onn.
Timpuh renggat parlimen ke diatu deka abis dalam bulan Julai taun baru.
PRS udah besedia betunga mua enggau rayat. Kami arap bendar ulih ngetanka enam sitak enti disiplin dijaga dalam parti, nadai sabotaj lalu semua parti Barisan Nasional (BN) nulung pangan diri Tan Sri Datuk Amar James Jemut Masing Presiden Parti Rakyat Sarawak (PRS)