Semua piak meseti bekerejasama mutarka ulah kasar ti majak nyadi
KUCHING: Rikod ulah kasar ba ruang bilik di nengeri tu bisi ngayanka penambah tiap taun, tau meri pengirau sereta ulih mai penanggul enti enda diputarka nengah saup semua piak.
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Datuk Fatimah Abdullah madahka, ulah kasar ba ruang bilik iya nya entara isu rama ti balat sereta patut diputarka enggau chara saup semua piak.
“Statistik PDRM bekaul enggau ulah kasar ba ruang bilik ngayanka rikod ti nambah tiap taun; ba taun 2013 bisi 238 kes; 2014 (358 kes); 2015 (279 kes); 2016 (427 kes) lalu nyentuk bulan Julai 2017 bisi 323 kes.
“Rikod ti nambah tu ngirauka sereta ulih mai penanggul rama enggau ngeruga pengelantang raban bansa, enti enda diputar enggau chara bisi ngayanka penambah ti ngirauka sereta ulih mai penanggul rama enggau ngeruga pengelantang raban bansa, enti enda diputar enggau chara saup ari semua piak.
“Berindik ari pekara tu, kelimpah ari ubah ngagai Akta Keganasan Rumah Tangga (Pindaan) 2017 ti meri kuasa ngagai Pegawai Kebajikan Masyarakat ngaga Perintah Perlindungan Kecemasan (EPO) enggau ngeyampatka proses nyaga orang ti diperinsa, Opis Menteri mega bisi ngelangkar mayuh sistem sukung rama ungkup sida,” ku iya.
Fatimah mansutka pekara nya dalam jaku pengelalu Hari Orang Indu 2017 Renggat Nengeri Sarawak, ke diatur opis menteri iya ba BCCK ditu, kemari.
Pengerami nya dipenyadi Kepala Menteri Datuk Amar Abang Johari Tun Openg sereta sama bisi digulu bini iya Datin Amar Datuk Juma’ani Tun Tuanku Bujang.
Bejaku baru Fatimah madahka entara ti dipejalaika opis menteri iya, nyendiaka Rumah Selamat tauka Shelter Home ke nyadi endur ngelindung tauka nyaga sementara enggau bantu luyar ungkup sida ti begunaka servis ti deka disediaka.
Opis menteri mega benung ngaluska kereteas MMKN dikena minta belanja sepenyampau RM2 juta, ke tuju nya, ku iya.
Kelimpah ari nya, lebuh ke ngenang hari orang indu ke diatur tiap taun kenyau ari taun 1988, ku Fatimah, endang dikena ngerami penyulut orang indu Sarawak dalam mayuh bidang pengidup, meri kelai basa ngagai sida dalam pengawa ngemansangka bansa enggau menua enggau bekunsi penerang pasal isu enggau pemar ke benung nyadi ke patut diputarka besaup.
Nitihku iya, nyerumba pengerami hari orang indu kenyau ari taun 2010 ngagai diatu, bisi tujuh buah bup udah mujur diasil sereta dichelak ti nyeritaka penyulut orang indu dalam mayuh bengkah bidang.
Bup ke udah mujur dichelak iya nya ‘Sarawak Women: Treading the Path of PostIndependence Years’ (2010); ‘Sarawak Women in Politics’(2012); ‘Sarawak women in Business’ (2013); ‘Sarawak Women in Volunteerism - Caring Hearth, Touching Lives’ (2014); ‘Sarawak Women in Politics - The Pioneers’ (2015); ‘Sarawak Women in The Arts’ (2015) enggau ‘Sarawak Women In Education: Shaping Mind, Body and Sprit’ (2016).
Lalu taun 2017, bup dikumbai ‘Sarawak Women in Sports: Their Achievements, Nation’s Pride’ udah mujur ditempa, dichelak sereta dipenyadika Abang Johari.
“Taja pan tiap taun rambai jaku ke dipilih bebida tang basa, gelar enggau puji nenagh chara meri gelar, nyelak bup enggau pemerindang khas tetap nyadi acara ke dikemeratka pengerami hari orang indu renggat nengeri Sarawak.’
“Taun tu kitai deka bemain sereta belumba begulai enggau jaguh indu Sarawak nengah rambai jaku ‘Orang Indu Sarawak Dalam Bidang Lumba enggau Main: Penyulut Sida, Ngemegahka Menua’.
“Atur pengerami kepenudi iya nya mantaika nama penerima enggau meri gelar ngagai tukuh orang indu enggau gerempung, ti dikena ngingat sereta meri kelai basa ngagai pengawa ke udah digaga sida dalam bidang ke dikemeran diri,” ku iya.