Abang Johari: PBB deka meri peluang ngagai chalun biak
Taja pia Parti Pesaka Bumiputera Bersatu diatu bedau ngaga pemutus sentang rintai nama chalun ke dipilih
KUCHING: Rintai chalun ngarika Parti Pesaka Bumiputera Bersatu ( PBB) ungkup Pengawa Bepilih Besai (PRU) sitak Parlimen bedau diputus.
Presiden PBB Datuk Amar Abang Johari Tun Openg madah pekara nya ba maya ke diatu mengkang diserenih.
“Sigi udah gaya dalam PBB dia sekeda pemangku penuduk bisi madah diri deka ngetu lalu meri peluang ngagai orang bukai.
“Ketegal nya kitai deka ngiga chalun nganti ke alai kitai mega deka meri peluang ngagai sida ke biak,” ku iya.
Abang Johari mansutka jaku nya pengudah ngulu Aum Supreme Kunsil PBB ke diatur di Indu Opis PBB di Jalai Bako ditu, kemari.
Ketegal nya kitai deka ngiga chalun nganti ke alai kitai mega deka meri peluang ngagai sida ke biak. Datuk Amar Abang Johari Tun Openg Presiden PBB
Nyaut tanya pemberita, Abang Johari madah sigi bisi sekeda pemangku madah ke diri deka ngetu.
Datuk Amar Douglas Uggah sigi dulu madah deka ngetu, ku Abang Johari seraya betundi.
Ngenang sentang aum kemari, iya madah sekeda pekara bisi dikerandau, entara sekeda iya nya Aum Besai Tiga Taun Sekali (TGM) PBB.
Ku iya, TGM nya deka diadu ba pun taun 2018 lalu palan endur aum deka dipu- tus pengudah tu ila.
Sebengkah komiti ku Abang Johari udah ditumbuh ngambi ulih nusun pengawa ke patut diadu nyerumba aum nya ila.
Komiti deka betuaika kededua pemangku Sapit Presiden Datuk Amar Douglas Uggah enggau Datuk Amar Awang Tengah Ali Hassan ke bela datai ngulu aum kemari.
“Berindik enggau nya, aum renggat ranting deka dulu diadu, kitai nyadang aum nya deka berengkah ba bulan Oktober enggau November taun tu,” ku iya.
Bela datai Sekretari Besai PBB Dato Sri Dr Stephen Rundi.