Benny sereta lebih 100 iku penyukung iya masuk UPP
SIBU: Chalun Ngati Kediri maya Pengawa Bepilih Nengeri (PRN) tu tadi ungkup sitak Kunsil Nengeri (DUN) Dudong, Dato Sri Benny Lee diatu udah masuk Parti Rakyat Bersatu (UPP).
Bela nitihka singkang iya masuk UPP iya nya lebih 100 penyukung iya ba sitak Dudong.
Presiden UPP, Dato Sri Wong Soon Koh maya mantaika berita nya madahka penatai Benny masuk UPP deka ngenegapka agi parti.
“Ba penemu aku penatai Benny ngagai UPP deka meri pengering ngagai parti. Baka ke udah ditemu, iya kala bediri nyadi chalun ngati kediri maya PRN ke udah lalu mujur bulih 3,288 undi.
“Tu mandangka iya bisi penyukung ke tegap ba sitak DUN Dudong,” ku iya madah ditu kemari.
Menteri Wang Kedua nya madah, juluk ati Benny mega seraris enggau juluk UPP dalam mantu rayat ba sitak menua tengah.
“Kitai gawa laban deka mantu rayat sereta ngemansangka menua Sibu.
“Nya alai, kitai sigi ngelaluka penatai iya enggau bala penyukung iya masuk UPP ngambi ngenegapka agi pengering UPP,” ku iya.
Menteri Dagang Entarabansa enggau E-Dagang nya madah, Benny masuk UPP enggau nadai kelikuh.
Nangkan nya, Benny madah diri berasai sinu laban diterima masuk UPP pengudah pansut ari Parti Sa’ati Rayat Sarawak (SUPP) lalu bediri nyadi chalun ngati kediri ungkup sitak DUN Dudong maya PRN ke udah.
Iya milih UPP laban tepaut ati meda perambu lima taun parti nya ke dikumbai Perambu Sibu 1 (RS1) dikena mantu rayat enggau ngemansangka menua Sibu.
“Perambu Sibu nya nyau sebaka enggau juluk ati aku iya nya deka ngemansangka menua Sibu ke pemaik rayat ditu,” ku iya.
Ex-Sapit Chairman SUPP Dudong nya pechaya deka mayuh agi penyukung iya masuk UPP udah tu ila.
“Aku nadai ngansak sida. Kitai semina nganti sereta meda,” ku iya seraya madah diri masuk UPP enggau nadai kakang ati.
Sama bisi datai chalun ulih menang UPP Parlimen Sibu enggau Lanang, Datuk Andrew Wong enggau Andrew Ting, Chairman Unit Bumiputera UPP Bawang Assan, Andrew Shilling sereta bala bukai.