Penusah angus nuntung Rumah Mat semina dikemata laban ti jauh ari Opis Bomba

MUKAH: Peranak Rumah Mat Limban di Emperan Kapok Lubuk Bemban, Batang Mukah dituntung penusah angus rumah seminggu ke udah.

Nitih ku penerang, rumah panjai nya bisi lapan pintu seraya empat ke bukai bedau tembu lebuh penusah nyadi, ngujungka 160 iku peranak nadai agi endur diau.

Sekeda bantu tumu datai ari Kaban Parlimen (MP) Mukah Dato Sri Muhammad Leo Micheal Toyad enggau Kaban Kunsil Nengeri (ADUN) Tellian Yussibnosh Balo.

Tuai Rumah Mat Limban, 62 taun, madah, lebuh penusah nyadi, semua peranak benung tinduk jenak, urung pukul 1 pagi.

“Kami enda sempat ngangauka Bomba laban menua kami jauh lalu kami semina ulih ngemataka api nyerarai sereta nganguska rumah dataika api padam urung pukul 6.30 pagi,” ku iya.

Taja pia, ripot polis udah digaga di Indu Opis Polis Pelilih (IPD) Mukah ba hari penusah nyadi.

Ba lansa ke semua, nitihka ku bala bukai, api mau bepun ari bilik tengah lalu nyerarai ngagai bilik ke bukai.

Pekara ti beguna endar, nadai nyawa bebadi taja semua reta nadai ulih diselamat nyengkaum dokumen ke beguna.

Kelimpah ari nadai endur diau, tebal agi bala sida madahka pengirau diri nadai bekal ai beresi.

Taja pia, piak Palan Servis Pengari Rayat ADUN Tellian deka mai pekara nya lalu naka ulih nguji mutarka iya enggau jampat nengah bantu ari ejensi bekaul.