Raban orang indu meseti nambahka penemu diri
Perintah semampai meri peluang bepelasarka penau ke dikembuan sida, ku Abang Johari
KUCHING: Perintah nengeri semampai meri peluang ngagai orang indu bepelasarka penau sida lalu enda bechiping nitihka penempa, ku Kepala Menteri Datuk Amar Abang Johari Tun Openg.
Iya madahka perintah nadai nyiping raban orang indu nengeri tu sereta sama diberi peluang mangku penuduk tinggi sekalika dalam opis perintah nengeri sereta besai tauka peribit.
“Aku arap bendar polisi perintah diatu deka meri peluang sereta ngangkatka orang indu ke bisi penau.
“Seagi aku nyadi kepala menteri, aku deka meri sama sebela sereta ukai bepelasarka penempa.
“Tang ke pemadu beguna iya nya semua kita enda tau enda nambahka penemu tauka penau, laban pengidup kitai jemah ila deka lebih mujur enti kitai bisi penemu enggau penau ke pemadu baru,” ku iya.
Abang Johari mansutka pekara nya lebuh ke bejaku seraya bejadika Hari Orang Indu 2017 Renggat Nengeri Sarawak ke diatur Opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembika Mit ba BCCK ditu, kemari.
Dalam opis perintah nengeri orang indu bisi diberi peluang mangku penuduk tinggi baka nyadi sapit sekretari perintah nengeri ( seiku), sekretari mendam opis menteri (dua), CEO penguasa kandang men- ua (seiku) sereta CEO injinir GLC (seiku), ku iya.
Nambahka nya ku iya ba opis perintah besai orang indu ari Sarawak mega bisi diberi peluang mangku penuduk tinggi baka ba opis kastam, opis pelajar, sereta seiku indu ari Sarawak di beri mangku pengawa ba opis menteri besai.
“Nya ngayanka orang indu Sarawak ulih. Enda ngira dini engur orang indu dianjung sida deka teulihka penyulut, lalu tu ukai bepelasarka penempa, tu bepelasarka merit,” ku Abang Johari.
Berebak enggu tu lebuh ke ngenang hari orang indu ti berambaika leka jaku ‘Indu Sarawak dalam Bidang Lumba enggau Main: Penyulut Sida Ngemegahka Menua’ senipak
Tang ke pemadu beguna iya nya semua kita enda tau enda nambahka penemu tauka penau, laban pengidup kitai jemah ila deka lebih mujur enti kitai bisi penemu enggau penau ke pemadu baru. Datuk Amar Abang Johari Tun Openg Kepala Menteri Sarawak
enggau SEA Games Ke-29 ke benung diatur sereta bisi atlet indu ari Sarawak.
Pengawa ngaga dokumentasi sejarah 43 iku atlet indu Sarawak ari taun 1950an nyentuk diatu, nengah pengawa nyelak bup ‘Sarawak Women in Sports: Their Achieve- ments, Nation’s Pride’.
“Nengah pengawa nyelak bup tu, dikearapka deka nyadi ke lalau sereta meri peransang lebih agi ngagai atlet biak sereta raban bansa Sarawak,” ku iya sereta meri puji enggau temegah ati ngagai semua atlet nengeri Sarawak ke udah mai pemujur ngagai menua.
Berebak enggau tu Abang Johari meransang raban bansa ulih chakah ari maruk diri dalam lumba enggau main lebih agi raban nembiak, nyadika lumba enggau main sebengkah pengerindu ke ulih nempa disiplin dalam diri empu.
“Lumba enggau main ke nyadi aktiviti ngelantangka diri, ukai semina ngeraika tubuh tang ulih nyeliahka bala nembiak ari ngereja aktiviti ke nadai mai penguntung.
“Kitai patut mansik pematut nyendiaka lebih mayuh palan ngelantang ati ti ukai semina di mengeri tang mega nyengkaum di menua pesisir ngambika senang dilawa bala nembiak sereta meri pengelantang maya bejalika aktiviti ti bepengerai baka gelanggang tenis, dewan badmiton, futsal enggau ke bukai.
“Tu ulih mantu ngurangka penanggul rama sereta ulah ti enda manah dalam raban bansa,” ku iya.
Nyerumba pengeri hari orang indu, Abang Johari diberi basa nyuaka perais ngagai penerima Anugerah Datuk Patinggi Laila Taib (Toh Puan Datuk Patinggi Norkiah); Anugerah Kepala Menteri Bidang Ketuai Orang Indu (Christine Wee Yian Phing); Anugerah Kepala Menteri Bidang Aktiviti Rama Indu (Dora Abdul Rahman);
Anugerah Kepala Menteri Bidang Pengawa Dagang Orang Indu ( Audry Wan Ulok); Anugerah Kepala Menteri Bidang Penyulut Khas Dalam Bidang Lumba (Tania Hamid Bugo) enggau Anugerah Gerempung Orang Indu Nyulut ( Gerempung Pengintu Pengelantang Islam Malaysia (PERKIM) Menua Sarawak).
Sama bisi datai, Datin Amar Datuk Juma’ani Tun Tuanku Bujang; Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Datuk Fatimah Abdullah, ex-Tuai Pemegai Menua (TYT) Nengeri Sarawak Tun Datuk Patinggi Abang Muhammad Salahudddin enggau bini iya Toh Puan Norkiah; Sapit Kepala Menteri Datuk Amar Douglas Uggah Embas enggau bini iya Datin Amar Doreen Mayang; Penyanding Penemu Pemansik Sains Sarawak Datuk Patinggi Tan Sri Alfred Jabu Numpang enggau bini iya Tan Sri Dato Sri Empiang Jabu sereta ke bukai.