DTTG mantu Doris Majing ngaga rumah nengah CSR
KUCHING: Gerempung ukai dikuasa perintah (NGO) Raban Pemikir Dayak (DTTG) Pampang Bintulu bejalaika tanggungpengawa rama korporat (CSR) mantu ngaga rumah Doris Majing ti kena bungkur projek jalai Pan Borneo.
Raban nya mantu Doris ngaga rumah baru ba Km12 Jalai Bintulu-Miri, ti nadai orang enggau sebilik.
Doris ti bekuli bebasu ba kedai sereta makai gaji enda lebih ari RM200.
Nitihka penerang ari DTTG, iya nadai kala nerima sebarang bantu pengidup ari opis ke bekaul.
Penusah pengidup Doris nya, matak penyiru ngagai raban DTTG Bintulu ngaga projek rumah nya ti dipejalaika dalam beberapa renggat baka nyendiaka palan rumah (renggat keterubah), nyemin geladak (kedua) enggau ke diatu ba renggat ketiga iya nya nusun dinding batu bata enggau nirika tulang pintu enggau jendila.
CSR nya betuaika chairman pampang nya, Agat Sigat sereta dibantu sida ke bukai baka Kaban Komiti Pusat, Franklin Jinggan; Ketuai Raban Nembiak Ronald Albert Jabat enggau sapit tukang wang pampang Evelyn Ubong.
Semua ungkus belanja dikena meli kereban ngaga rumah Doris nya, asil ari pemeri enggau bantu bala kaban DTTG.
Projek CSR nya senipak enggau misi sereta visyen penumbuhka raban pemikir nya ke deka meri servis sereta bantu rama ngagai ke beguna sereta patut dibantu, lebih agi raban bansa Dayak.
Barang sapa ke deka meri bantu dikena ngaga rumah nya enda ngira sekalika NGO tauka korporat, disambut enggau manah tau betelefon ngagai Agat ba lumur 01125115770. KAPIT: Kaban Kunsil Nengeri (ADUN) Bukit Goram, Jefferson Jamit Unyat udah nyuaka chek Projek Mit Pemansang Menua Pesisir (MRP) dikena melanja aktiviti rama ngagai pengari serakup enggau kelab ditu, apin lama ke udah.
Pengawa tu udah diatur ba sebengkah hotel ditu lalu udah digulu bala ketuai opis perintah enggau ketuai raban bansa.
Sekeda ari bala penerima chek tu iya nya Kelab Pengelantang Raban Indu Polis Kapit (Amanita) nerima RM5,000, Opis Pemansang Raban Bansa ( KEMAS) Baleh RM5,000, Komiti Pemansang Komuniti Pelilih Kapit RM10,000 sereta Kelab Lumba Melatai RM5,000.
Dalam jaku dipansutka iya, iya madahka bala penerima belanja nya datai ari perintah.
“Tu belanja ari perintah. Sebedau tu, bala kita udah minta bantu belanja, lalu aku udah ngagihka belanja aktiviti rama ungkup bala kaban kelab.
“Terang memanah ngagai bala kaban pasal belanja tu lalu gaga ripot kini tuju belanja nya. Pejalai belanja mega meseti dipatau baka ti dipinta dalam keretas kereja ti udah dianjung suba,” ku iya ngelalau.
Dulu agi ari nya, ba program ke bukai, Jamit udah ngemendarka belanja penyampau RM7,000 ngagai Serakup Dayak Iban Sarawak (SADIA) Kapit dikena ngatur Pekit Badminton 2017 sereta RM5,000 da agi ngagai Sekula Sekondari (SMK) Selirik.