PBDSB keran deka meda bisi pengari Dayak dalam Petros
KUCHING: Parti Bansa Dayak Sarawak Baru (PBDSB) dekaka raban profesional Dayak ari industri minyak enggau gis diperunding diberi pangku pengawa besai ba Petroleum Sarawak Berhad (Petros).
Baka peranak Sarawak ke bukai, Dayak mega udah lama ngaul diri ba industri, iya nya kenyau ari kompeni petroleum ari Belanda numbuhka Shell di Sarawak, ku Ketuai bagi Pemadah PBDSB Bobby William.
“Basa patut diberi ngagai Dayak ketegal ti udah bela ngemansang industri tu. Dayak patut diperunding diberi pangku pengawa besai ba Petros.
“Sigi enda disangkal, kelebih agi ba bansa Eropah, British enggau Amarika diak Dayak diaku ngembuan pengelandik sereta bepenau ba industri petroleum nyentuk ngagai diatu,”ku iya nengah surat penerang berita kemari.
Iya nambah, mayuh bansa Dayak ke bepenau mangku pengawa besai ba Sarawak Shell Berhad enggau Petronas baikka nya diatu tauka ke udah pinchin.
Ensanus Kepala Menteri Datuk Amar Abang Johari Tun Openg udah mantaika nama chairman Petros enggau kaban direktor.
Abang Johari nengah surat penerang berita nya nyiri Tan Sri Datuk Amar Hamid Bugo nyadi chairman Petros lalu nyiri empat kaban direktor iya nya Dato Muhammad Medan Abdullah, Sharbini Suhaili, Zuraimi Sabki enggau Heng Hock Cheng.
Petros diatu ku Abang Johari benung ngiga orang ngisi pangku pengawa Ketuai Pemesai Eksekutif ( CEO) Petros.
Ngenang kaul ke sama, PBDSB ngansak ketuai ari bansa Dayak ba Perintah Nengeri bejaku ngari sereta negika hak komuniti Dayak, ngambi bela diserangkum sereta diberi pangku pengawa besai dalam Petros.
“Kati tau baka nya enti kompeni petroleum ari menua luar ngaku sereta nguna pengelandik kitai Dayak, tang enda dipalik Perintah Nengeri,” tandu Bobby.