Bekerejasama nyaga pengelikun rumah, patau anak ari bemain machis: Nyalau
ENGKILILI: Kaban Parlimen ( MP) Lubok Antu, Datuk William Nyalau Badak ngansak kaban Komiti Pemansang Enggau Pengelikun Genturung Pendiau (JKKK) di serata nengeri patut ngemeratka pengelikun rumah ari baruh pegai sida empu ari dikeruga penusah angus.
Nitih ku iya, endang patut semua komiti JKKK bekerejasama enggau peranak rumah panjai matau sebarang aktiviti ti tau ngasuh penusah angus nyadi.
“Nya alai, kitai ngarapka sida ke diau di tumpuk pendiau, genturung pendiau sereta peranak rumah panjai numbuhka Komiti Nagang Penusah Angus di rumah sida empu.
“Ukai semina nya aja, aku deka ngingatka bala apai indai ti bisi anak mit di rumah ngambika matau semua pengawa bala anak sida nentuka enda bemain enggau machis sereta kereban ti tau ngasuh penusah angus nyadi,” ku iya.
“Nyema apai indai ilap meda pengawa bala anak sida, ukai semina ngeruga pengelikun bala anak ke diau di rumah aja, tang mega tau ngasuh semua kitai betapi enggau penusah,” ku iya nyemetak.
Iya mansutka jaku nya lebuhka bejaku bejadika Pengawa Nutup Program Bomba Komuniti diatur Opis Bomba engga Penyah Penusah Bagi Menua Sri Aman enggau kerejasama Palan Servis Komuniti Parlimen Lubok Antu bepalan di Rumah Entu Nawin, Klampo Engkilili semak ditu, kemari.
Ku iya, pengawa numbuhka Komiti Nagang Penusah Angus beguna endar laban tau nyadi raban ti gawa matau sebarang pun penusah angus.
Iya mega ngansak ngambika peranak minta bantu Opis Bomba enggau Penyah Penusah sereta bemacham ejensi perintah ke bukai bejalaika bemacham program latih bekaul enggau pengawa nagang penusah angus.
Ku iya, pengawa ke bansa tu ulih meri latih ngagai peranak matau sereta nagang penusah angus ari ngaguska semua rumah sida.
“Pengawa berumah begunaka awak ti panjai, tang chukup rugi lebuh rumah kitai angus pia aja, nya alai, sebedau penusah tu nyadi, kitai meseti tumu bejalaika pengawa ti patut,” ku iya silik.
Sama bisi datai Pemesai Pelilih Lubok Antu, Richard Ngumbang, Pemesai Pekara Khas (JASA) Bagi Menua Sri Aman, Geoffrey Baja, Kaunsi- lor Zainie Aji, Kaunsilor Masir Bitin sereta bala bukai.
Berebak enggau nya, William mega bisi nyuaka pemeri 20 unit perengka pengerara api ngagai JKKK Rumah Entu, Klampo kelimpah ngemendarka agih belanja penyampau RM7,000 enggau RM5,000 ngagai JKKK sereta Biro Wanita Rumah Entu.
Urung 300 iku peranak ari rumah panjai besemak bela ngulu program tu ke alai licha pasal pengelikun penusah angus udah dikenatai Pemesai Kanan Bomba II ari Balai Bomba enggau Penyah Penusah Sri Aman, Jilin Itar.