Isu Rohingya: PBDSB mantah perambu perintah
PBDSB mantah langgur perintah ti deka mai bansa Rohingya ti ngerarika diri, tama ke menua tu
KUCHING: Pari Bansa Dayak Sarawak Baru (PBDSB) bebendar madahka diri mantah perambu ti deka mai bansa Rohingya ti ngerarika diri tama ke menua tu.
Ketuai Raban Nembiak PBDSB, Rapelson Richard Hamit madahka sida mantah penerang Sapit Menteri Dalam Nengeri, Datuk Nur Jazlan Mohamed bekaul enggau isu bansa Rohingya ti ngerarika diri, laban nya endang pekara ti enda patut.
Ku Rapelson, nitih ku Nur Jazlan naka ke diatu bisi urung 56,000 iku bansa Rohingya ti ngerarika diri bisi di menua tu sereta bisi kad ‘Suruhanjaya Tinggi Pertubuhan Bangsabangsa Bersatu Mengenai Pelarian’ (UNHCR).
“PBDS Baru bebendar mantah penemu perintah ti merambu deka ngemendarka lebih mayuh agi bansa Rohingya ti ngerarika diri ke menua tu.
“Anang nyadika Malay- sia sebuah menua kampar. Menua kitai udah chukup tebilang enggau isu 1MDB, Nama pematut Malaysia nyadi menua diperati dunya baru?,” ku iya nengah penerang berita, kemari.
Rapelson mansutka penerang nya lebuh ke ngenang isu ti dikerembaika dalam media rama bekaul enggau pengawa nguji deka nganjung bansa Rohingya ti ngerarika diri nya ke Serian.
Nandu baru, iya madahka sebarang perambu perintah besai ti deka mai tama bansa Rohingya ti ngerarika diri ke Sarawak endang deka disangkal sereta enda dikemendarka.
Ku iya, raban bansa Dayak pan disema baka ‘temuai’ di nengeri tu laban pekara bekaul enggau tanah adat bansa asal ( NCR) bedau diputuska.
“Taja pan kitai enda nemu pengamat berita tu, tang kitai patut bejejaga. Sarawak kelalu mit sereta nadai endur bansa Rohingya ti ngerarika diri nya.
“Enti sida tama ke menua tu sida deka ngerampas peluang gawa di nengeri tu lalu ulih ngusutka tikas ekonomi enggau penatai pemisi rayat,” ku iya.
Kelimpah ari nya Rapelson mega nyangkal penerang seiku Kaban Kunsil Nengeri (ADUN) Datuk Idris Buang dalam akaun Facebook, ti madahka perambu nya digaga ketegal polisi kasihka mensia.
Taja pia ku Rapelson aspek pengelikun sebengkah pekara ti pemadu dikemerat sereta patut diperunding enggau dijaga.
“Idris Buang madahka ketegal polisi kasihka mensia, tang iya patut nemu pasal pengelikun peranak Sarawak empu patut dijaga,” ku iya.
Bansa Rohingya ti ngerarika diri nya enda diterima mayuh bengkah menua sereta mengkang ngerarika diri nengah beberapa garis entara menua.
Bansa Rohingya ti ngerarika diri nya diburu perintah Mynmar ari Rakhine sereta enda diterima perintah Thailand, Kamboja, Laos, Nepal enggau Pakistan.
“Kelimpah ari ke deka mai tama bansa Rohingya ti ngerarika diri nya ketegal politik iya nya nyadi pengundi antu,” ku Rapelson.
PBDS Baru bebendar mantah penemu perintah ti merambu deka ngemendarka lebih mayuh agi bansa Rohingya ti ngerarika diri ke menua tu.