Andrew Wong, Andrew Ting chalun UPP di Lanang enggau Sibu
SIBU: Nama dua iku chalun Parti Rakyat Bersatu (UPP) ti deka disabung ba Parlimen Sibu enggau Lanang maya Pengawa Bepilih Besai (PRU) ti deka datai udah dianjung ngagai pemesai Barisan Nasional (BN).
Seduai tu iya nya Dato Andrew Wong ( Parlimen Sibu) enggau Andrew Ting (Parlimen Lanang).
Presiden UPP Dato Sri Wong Soon Koh madah, parti sida nganjung nama dua iku manuk sabung nya bepun ari Menteri Besai enggau Kepala Menteri minta parti meri nama chalun dikena napi PRU tu ila.
“Nya alai, UPP udah nganjung nama Andrew Wong enggau Andrew Ting ti dipeda ngembuan pengelebih ulih menang ba dua iti penuduk parlimen nya,” pia ku iya madah.
Pekara nya dibantaika iya maya datai ngulu Hari Diri Sebilik Gerempung Tuai Rumah Sibu (PTRS) ba Mini Kampung Budaya 1Malaysia, Bukit Aup, hari Minggu tu tadi.
Wong ti mega Menteri Dagang Antarabansa enggau E-Dagang madahka pemesai BN ngandalka parti sida nyaup BN menang dua tauka tiga iti penuduk majoriti China baka penuduk Parli- men Sibu enggau Lanang ba PRU serak tu.
“Peminta enggau pengandal tu nejuka parti kitai ransing deka berengkah tumu nyungkakka agi strategi ngambika UPP ti endang kaban BN menang ba penuduk alai bediri,” ku iya madah baru.
Bekenangka dua iku chalun nya, Wong madahka seduai nya agi biak, bisi pengelebih sereta nadai bepenanggul gawaka rayat ditu.
Tu ku iya nyengkaum mai pemansang ngagai mengeri Sibu sereta menua pesisir dalam kandang lima taun ( 2018- 2022) nengah Perambu Pemansang Sibu Keterubah (RS1).
“Ngarapka rayat baikka ba Parlimen Sibu tauka Lanang ulih meri sukung ngagai seduai lalu pechayaka seduai mai pemansang sereta bejadika RS1 enggau mujur nangkan ke tu ila,” pia ku Menteri Wang II nya.
Ngena awak pengerami nya, Kaban Kunsil Nengeri (ADUN) Bawang Assan nya minta bala tuai raban bansa enggau tuai rumah semampai tegut nyukung perintah ari belakang.
Nambahka nya, bala tuai rumah mega ku iya, patut nerang ngagai peranak rumah panjai sida lebih agi bekaul enggau program enggau pemansang ti deka sereta udah digaga ba menua.
“Enti bisi penanggul nyadi, kita tau mantaika pekara nya ngagai Gerempung Tuai Rumah, Unit Bumiputera UPP Bawang Assan, piak bekuasa menua (PBT) tauka pengari rayat empu,” ku iya madah.
Sama bela datai maya tu iya nya Chairman Servis Komuniti (LPK) UPP Sibu Dato Andrew Wong enggau sapit iya ti mega Chairman Unit Bumiputera UPP Bawang Assan Andrew Shilling, Temenggong Stanley Geramong enggau Pemancha James Semilan.
Bala bukai ti mega ngulu pengerami sehari nya iya nya Penghulu Jeffery Sut, Penghulu Richard Ampi, Penghulu Evely Holly Sebom, Chairman PTRS Tuai Rumah Dieo Kanyan enggau Tuai Rumah Juing Buntok.