Terminal padang bilun ti majak sekut patut ditangkir baru
KUCHING: Kapasiti langkar terminal padang bilun ti nyau enda setipak enggau penyampau trafik orang tambang, patut bisi perambu tumu nangkir baru ngambi pulai ke pengelantang orang tambang.
Chief Operating Officer, Malaysian Aviation Commission (MAVCOM), Azmir Zain madahka, tujuh ari 21 padang bilun ke ari baaruh pegai Malaysia Airports Holdings Berhad (MAHB) diatu udah nerima orang tambang ngelui ari kapasiti langkar terminal.
Ku iya lebuh ke meri penerang ngagai raban media madah, bepelasarka ripot MAHB 2016 di nengeri tu bisi dua terminal padang bilun ke udah nerima orang tambang ngelui ari kapasiti langkar terminal.
“Di Sarawak, terminal padang bilun Mulu ti ngembuan 0.05 kapasiti langkar terminal (mppa) udah nerima 120 peratus trafik orang tambang enggau terminal padang bilun Miri ti bisi 2.00 mppa udah nerima 110 peratus trafik orang tambang.
“Kapasiti langkar terminal padang bilun ulih nangkup peminta guna 110 ngagai 120 peratus trafik orang tambang, tang enti nerima manggai 100 peratus suah agi patut udah bisi langgur terminal padang bilun nya ditangkir.
“Enti ngelui ari nya (100 peratus) suah iya orang tambang berasai enda lantang laban teminal nya nyadi sekut. Nama ke patut dikereja iya nya langgur dikena napi penanggul nya patut dilanggur sebedau (penanggul) nyadi, selalu iya setaun sebedau nyadi,” ku iya lebuh dikerandau raban media.
Dulu ari nya iya meri penerang ngagai raban media bekaul enggau MAVCOM sereta pasal hak sebedau penerebai, ke diatur MAVCOM ba sebuah hotel ditu, lemai kemari.
Ku iya, selalu iya padang bilun sekut tauka bisi peminta tinggi ari orang tambang lebuh penerebai datai tauka angkat sereta dalam timpuh ke sama dalam sehari nya.
Berebak enggau tu lebuh ditanya sekalika bisi pematut piak MAHB minta terminal padang bilun nya patut ditangkir, Azmir madahka MAHB deka nganjung langkar tauka langgur penemu ngagai perintah.
“MAHB deka ngaga langgur penemu ba maya ke patut ngagai perintah besai sereta nengeri.
“MAVCOM dipinta nentuka input sekalika bisi pematut terminal nya ditangkir tauka enda,” ku iya
elimpah ari nya bepelasarka trafik orang tambang MAHB, beberapa padang bilun dipelabaka deka manggai kapasiti langkar terminal padang bilun dalam timpuh lima taun ke dekka datai ti nyengkaum Kuching, Sibu, Bintulu enggau Limbang.
Lalu terminal padang bilun Mukah enti bepelasarka statistik MAHB 2016 ke bisi 0.50 mppa ke diatu udah nerima 12 peratus trafik orang tambang.