UNIMAS, TEGAS deka nentuka nembiak Sarawak tegap dalam STEM
KUCHING: Universiti Malaysia Sarawak (UNIMAS) begulai enggau Tabung Ekonomi Gagasan Anak Bumiputera Sarawak (TEGAS) chakah deka meri penyedar sereta ngenegapka nembiak Sarawak dalam pelajar enggau penemu Sains, Teknologi, Injiniring enggau Matematik (STEM).
Naib Canselor UNIMAS, Profesor Datuk Dr. Mohamad Kadim Suaidi madahka aktiviti bekaul enggau STEM nya deka dikerembaika ngagai sekula primari di nengeri tu.
Nitihku iya, Opis Menteri Pelajar (KPM) udah netapka juluk pukul rata 60:40 bagi Sains dibandingka enggau seni ba sekula di Malaysia.
“Pekara tu enda tau enda diaduka enggau bebendar agi di nengeri Sarawak, laban semina 26 peratus aja nembiak kitai ke bisi latar belakang STEM.
“Ngelala bagi peminta dikena napi isu tu, UNIMAS ngelamatu bejalaika tanggungpengawa besai enggau TEGAS ngenegapka nembiak Sarawak dalam pelajar STEM, beberapa aktiviti udah dipejalaika baka nyendiaka Makmal Pelajar STEM ba enam bengkah sekula primary di Sarawak sereta dikearapka ulih dikerembaika ngagai 158 buah sekula ke bukai,” ku iya.
Kadim mansutka pekara nya dalam jaku pengelalu International UNIMAS STEM Engineering Conferences (EnCon) 2017 ke diatur Fakulti Kejuruteraan UNIMAS ba sebengkah hotel ditu, kemari.
EnCon 2017 ti diatur 13 ngagai 15 September ti ngena rambai jaku ‘Gearing Towards a Greener Future’ udah mujur dipenyadika Kepala Menteri Datuk Patinggi Abang Johari Tun Openg.
“Apin lama ke udah, UNIMAS ngatur STEM Innovation & Nature Fair 2017 ba MRSM Kuching enggau program Sarawak TVET Initiatives 2017.
“Juluk kitai deka nambahka pukul rata pemayuh nembiak STEM udah bisi lalu diaduka enggau manah, lalu tu kena nyikap rayat nyadi menua maju ba taun 2030 ila,” ku Kadim.
Ba EnCon 2017 bisi lima iku dikangau bejuraika keretas kereja ‘ucaptama’ sereta lebih 80 keretas kereja dibantai sereta dipejuraika kelimpah ari bengkel STEM bisi diatur ti mungkur lebih 100 iku pegawai opis pelajar enggau pengajar sekula sekondari ari serata Sarawak.
Nambahka nya dikena meri penyedar ngagai bala nembiak pasal pemesai guna penemu STEM, Ekspo Sains, Teknologi enggau Injiniring ( i- STEEx) bisi diatur nyerumba EnCon 2017, ti sama udah mujur dipenyadika Abang Johari.
Berebak enggau tu Abang Johari lebuh ke bejaku ba pengerami nya ngarapka speaker ke dikanggau ulih bekunsi penemu enggau pesereta.
Laban ku iya penemu tauka asil ari aum nya ulih diguna sereta dikerembaika ngagai menua pesisir.
“Aku arap bendar kita (speaker) ulih bekunsi penemu enggau bala pesereta sereta aku deka beratika nama pekara ke diperambu kita ngagai aku nengah aum tu, ke ulih dilangkar nyadi polisi ke ukai semina ulih dikena nambahka penemu aja tang nyengkaum nambahka nilai pengeraja sasal ke bisi di Sarawak ke deka dipekunsi enggau menua ke semak enggau kitai.
“Meri puji ngagai TEGAS ti nempa kerejasama enggau opis menteri pelajar bekaul enggau pengawa ngemeratka penemu enggau pelajar STEM.
“Enti STEM dibai ke menua pesisir mayuh orang bedau nemu, nya alai kitai patut nempa penyedar pasal pemesai guna STEM dalam kitai nuju pemansang,” ku iya seraya meri puji ngagai UNIMAS ke udah nempa kerejasama enggau industri sereta organisasyen.
Nyerumba EnCon tu mega, UNIMAS bisi nempa kerejasama nengah pengawa nyain sempekat pemereti ati (MoU) enggau lapan bengkah industri sereta organisasyen ti enggau juluk deka ngangkatka aktiviti akademik enggau pemansik.
Lapan industri tauka organisasyen nya nyengkaum The Institution of Engineers Malaysia; The Institution of Engineers Malaysia (Sarawak Branch); Geo Crete Specialist Sdn Bhd; The Welding Institute, United Kingdom; Universitas Pancha Bhakti; ACME Integrated Services Sdn Bhd; Turbowolf Resources Sdn Bhd enggau Pakistan Institute of Enginering and applied Sciences.