Perintah nengeri udah meri bantu RM80,000 ungkup KJA
KUCHING: Beserimbai enggau atur pengawa Gerempung Pengarang Berita Sarawak ke deka ngatur Kenyalang Journalism Award (KJA) di Miri kena 22 November tu ila, perintah nengeri udah nyuaka bantu sepenyampau RM80,000 dikena ngemujurka atur pengawa nya.
Bantu nya disua Kepala Menteri Datuk Patinggi Abang Abdul Rahman Zohari Tun Openg ngagai presiden KJA Andy Jong Wan Joon, di opis Kepala Menteri di Wisma Bapa Malaysia di Petra Jaya ditu, kemari.
Bantu nya nyengkaum wang perais ke kategori baru Gelar Pengarang Berita Ekonomi Digital, ke endang ‘khas’ dipilih Abang Zohari.
“Nya alai, bantu ke diterima serakup tu mayuh agi ari taun siti nyin tadi, laban bisi penambah kategori baru, iya nya Ekonomi Digital.
“Kelimpah ari bantu besai ari perintah nengeri Sarawak, bantu ‘Emas’ bukai datai ari tiga bengkah ejensi besai iya nya Sarawak Energy Berhad (SEB), Petronas enggau Shell, ke bela meri RM50,000 ungkup KJA, ke bela digulu ulih Kepala Menteri empu di opis iya ditu, bulan Jun tu tadi,” ku Jong.
Kompeni besai Petronas udah ngaga sempekat enggau KJA, lalu deka meri RM50,000 ninting taun datai ngagai taun 2020 tu ila.
Ba lansa bukai, Jong madah ke sekali tu mega, KJA 2017 mechah rikod sejarah KJA nya empu laban ke taun tu udah nerima pengabis mayuh penyereta ke udah dianjung ngagai Angkatan Zaman Mansang (AZAM) ke nyadi palan ngatur semua penyereta KJA, iya nya manggai urung 413 penyereta, lebuh nya ditutup kena 1 Ogos tu tadi, sereta kategori Ekonomi Digital ditutup kena 31 Ogos 2017.
Ke taun tu ku iya, 11 kate- gori deka dipekitka, ke nyendiaka lebih RM200,000 perais ungkup pengarang berita di serata menua Sarawak.
Ba atur pengawa nya ila, Abang Zohari deka ngepunka atur pengawa nya, ti mega nyadi temuai ti dibasa ke malam nya.
Ba lansa bukai, pemangku chairman Gerempung Pengarang Berita Pelilih Menua Kuching, Jacqueline David begulai enggau 3 iku pengarang berita ari Sarawak, 2 ari Sabah lalu sida pengarang berita bukai ari Semenanjung Malaysia deka bejalai enggau National Press Council (NPC) ngelawa Berlin, Germany (Study Tour) nengah program ‘Industry 4.0 and Digitalisation Programme for Media’ berengkah ari Hari Enam (16 September tu) ngagai 25 September 2017.
Pejalai nya di spunsa ulih NPC, K-Pintar Sdn Bhd enggau HRDF (Human Resource Development Fund). SIBU: Dayak Think- Tank Group ( DTTG) udah nemuai ngagai Palan Dialisis Persatuan Bulan Sabit Merah Miri, kilah ensana.
Pengawa tu betuaika Chairman DTTG Miri Elias Lipi Mat enggau sapit iya Philip Asry sereta bela disempulang bala raban gerempung ke bukai.
Maya pengawa tu, raban sida bisi nyuaka pemeri ngagai orang ke berubat dia.
“Tuju kitai ukai semina deka nyuaka pemeri ngelempungka agi penusah ke ditapi orang berubat ditu tang kitai deka nerenakka ulah bebasa, kasih ke orang sereta rindu nulung orang ke tasah ba diri empu,” pia ku Elias maya pengawa nya.
Iya andal amat mensia mayuh ke bukai baikka raban korporat tauka kompeni bela lempung jari datai nyuaka bantu ngagai orang ke tusah lebih agi napi penyakit baka dia.
Pengawa gerempung tu mega bela disukung Kaban Parlimen Miri Dr Teo Yu Keng.
Teo ngena awak nya ny- uaka tulung ari iya empu ngagai orang ke berubat ba palan nya.