80 iku kaban PPWE Sarikei, Belawai udah ngulu program diatur JKM Sarikei
SARIKEI: Bisi 80 iku orang tuai ti diau ba Palan Servis Orang Tuai ( PPWE) ari Sarikei enggau Belawai udah ngulu ‘Program Explorasi Amal Merdeka Warga Emas 2017’, bedau lama.
Program tu diatur Opis Pengintu Pengelantang Mensia Mayuh (JKM) Bagi Menua Sarikei.
Penyelaras Program, Malek Jobli madah, batang tuju atur program tu deka ngadaka orang tuai ti bepengerai, regas, lantang ati enggau chakah.
“Nengah prorgam tu mega nyadi pelasar ngadaka komuniti ti bisi penyiru nengah pengawa volunteer.
“Berebak enggau nya, iya mega meransang pengawa volunteer ngagai komuniti di menua pesisir,” ku iya.
Program tu udah diatur bepalan di Iftitah Resort Belawai.
Ba atur program nya, bala pesereta udah dibai nyereta aktiviti explorasi enggau lumba rama.
Nitih ku Malek, tuju program tu ngadaka orang tuai ti bepengerai sereta diau lantang nengah aktiviti belepa kelimpah ngaul diri enggau orang bukai.
Pia mega ku iya, aktiviti tu mega dikena ngisi ka- linda PPWE ungkup kandang menua dikaul.
“Kitai dipinta bejalaika aktiviti nitihka sekeda atur dikena meransang aktiviti bepengerai ngagai bala kaban.
“Kitai ngarap nengah atur program tu, raban orang tuai deka terus bisi pengingin nyereta program ke bansa tu dudi hari,” ku iya.
Sama bisi datai ngerichahka agi program nya Pemesai Opis Pekara Khas (JASA) Sarikei, Ahmat Adai ti ngarika Kaban Kunsil Nengeri (ADUN) Belawai, Datu Len Talif Salleh enggau Direktor JKM Sarawak, Haji Abang Shamshudin Abang Seruji.