Opis Taman Negara enggau Jelu Siga Sarawak deka dibuka
KUCHING: Sebuah opis baru ari baruh Opis Kampung (JHS), Opis Taman Negara enggau Jelu Siga Sarawak deka dibuka, pengabis tumu, taun baru tu ila.
Sapit Kepala Menteri ti mega nyadi Menteri Rampa Menua, Datuk Amar Awang Tengah Ali Hasan madahka, opis baru tu deka mekuh ngagai chara pejalai pengawa opis tu ke nyentuk agi, kelebih agi taman negara, enggau sanktuari jelu siga.
“Kediatu, pekara bekait enggau taman negara enggau jelu siga dijaga ulih JHS enggau Sarawak Forestry Corporation (SFC) . Tang, pemisi opis nya empu ila (taman negara enggau sanktuari jelu siga), dikarapka nyadi pakar dalam kededua pekara tu,” ku Awang Tengah.
Iya madah munyi tu lebuh dikerandau pengudah ngepunka atur pengawa ‘Regional Forum Innovation, Inclusiveness and Impact:’Strengthening and Diversifying Financing for Protected Areas’ ti digulu lebih 500 iku penyereta ari menua tu enggau antarabansa di sebuah hotel ditu, kemari.
“Pemerat nya ila, opis tu ulih ngambi mayuh agi orang gawa ke endang pakar dalam pekara tu, sereta ngembuan chukup pengereja pengawa. Ke nyadi pemerat lebuh opis tu dibuka, opis menteri kami semina ngaga atur,lalu program sereta pejalai pengawa opis nya dikemutar ulih opis baru nya ila,” ku iya.
Ba lansa bukai, Awang Tengah ti mega nyadi Menteri Pengawa Industri enggau Pemansang Pengawa Orang Dagang, madahka Perintah Menua Sarawak ngeletakka pengawa nyaga sitak sereta jelu siga di menua tu, pekara ke berat endar ba agenda perintah nengeri.
Ku iya, ba pekara Sitak ke Dijaga (Protected Areas) enggau Dagang temuai, urung 4.6 juta temuai dirikod bisi datai di Sarawak dalam taun 2016, lalu ari penyampau nya, 12.4 peratus ngelawa taman negara sereta sitak kandang menua asal ke bukai, lalu asil ke di ulih ari nya, nyapai urung RM5.7 juta.
“Nya alai, bisi pemerat ngerembaika ungkup bajet ke sitak ke dijaga kena beratika sitak tu dijaga enggau manah.
“Nya alai, ngaga ‘ penjenamaan’ baru sereta promosyen pasal taman negara Sarawak, makit ke strategik sereta muka taman negara baru, ulih matak mayuh agi temuai ngagai sitak tu, lalu ngemanahka agi pemisi menua tu ari asil ke di ulih ari sitak ke dijaga (protected areas),” ku iya.
Iya nandu baru madahka, kena beratika Sitak ke Dijaga diintu enggau manah, iya madah Sarawak enda ulih ngereja pengawa nya kediri aja, alai kerejasama ari serata dunya mega berat, laban menuamenua di serata dunya tu pan belajar ari pangan diri.
“Sarawak seruran ngelaluka kerejasama antarabansa nengah kaul konservasyen strategik begulai enggau sekeda menua di dunya tu, baka Jepun, Netherlands, Denmark, enggau sekeda gerempung entarabansa baka ITTO, UNDP, Global En- vironment Facility (GEF), World Wildlife Fund (WWF) enggau Wildlife Conservations Soceity (WCS).
“Kami temegah ati kelebih agi laban bisi pemisi program ‘RIMBA Sarawak’ ke nyendiaka palan ke efektif ke ulih alai endur palan saintifik ke tebilang datai sereta ngaga Pansik enggau Pemansang (R&D) di Taman Negara kami sereta sekeda sitak ke bepengeraja enggau biologi,” ku iya.
Iya nandu baru madahka, taun nyin tadi, lebih ari 12 spesis baru jelu siga bisi ditemu di Ulu Sebuyau enggau Lanjak Entimau.
Sama bisi enggau ngulu atur pengawa nya kemari, Pengari Residen Program Pemansang Bangsa-bangsa Bersatu, ke Malaysia, Singapore enggau Brunei Darussalam, Stefan Priesner, Kontroler Opis Natural Resources and Environment Board (NREB) Peter Sawal, enggau Direktor Opis Kampung (JHS) Sapuan Ahmad.