Semua produk dagang temuai di nengeri tu patut chakah dilaku
Ngambi ulih ngangkatka industri tu seraya nambahka ekonomi menua tu
KUCHING: Kompeni infrastruktur Teknologi, Pemadah enggau Penyambung (ICT), SACOFA Sdn Bhd, udah meri penerang dikena nyapai tagit bungkur telekomunikasyen enggau jalur lebar di Sarawak.
SACOFA Sdn Bhd enggau kerejasama Ejensi Nuklear Malaysia enggau Majlis Bandaraya Miri udah ngatur licha pengelikun mensia mayuh kemari di Miri, dikena betapi enggau berita selebubu enggau saru penemu raban bansa bekaul enggau telekomunikasi.
Licha ke sebaka mega udah mujur dipejalaika enggau kerejasama Majlis Perbandaran Sibu enggau Majlis Bandaraya Kuching Selatan sebedau tu sereta deka diteruska nyentuk taun baru ila.
Objektif licha nya, bekunsi penerang lebih agi bekaul enggau saru penemu tauka berita selebubu pasal tiang telco ti disediaka piak iya.
Pengarah Urusan SACOFA Zaid Zaini, madahka: “Saru penemu mensia mayuh bepun ari mayuh raban, media rama, seraban NGO ti nyengkaum mensia mayuh enggau pegawai.
“Runding ( tauka licha) tu meri peluang ke manah endur bala pakar bejuraika fakta ti sidukung ngena bukti ti kukuh, dikena ngenukuka pengibuh mensia mayuh dititihka sereta nadai saru penemu,” ku iya.
Nambahka nya licha nya mekuh tauka ngenang pasal Frekuensi Radio (RF) enggau Medan Elektromagnetik (EMF), ke udah dipejalaika piak iya di serata Sarawak.
Bukti ngayanka tiang telekomunikasi nya nadai ngeruga pengerai enggau pengelikun mensia mayuh, enda baka ke dipadahka sebedau tu ngelui ari ke patut.
Tiang telekomunikasi ke dipasang di serata Sarawak ulih piak nya, nitihka tikas ke udah ditetapka standard kebangsaan enggau antarabansa.
Ujian RF sebedau tu udah dipejalaika Agensi Nuklear Malaysia, entara bulan Januari ngagai Oktober 2017 ba lapan kandang menua pesisir enggau mengeri sereta dua ditimpuhka dipejalaika sebedau ujung taun tu.
Audit pelepasan RF taun tu udah dipejalaika di Kuching, Sibu, Miri enggau Sarikei lalu deka dipejalaika di Bintulu sebedau ujung taun tu.
Nitihka penerang sida madahka penyampau ke dilepaska dalam kandang endur semak tiang telekomunikasi iya nya variasi ari 0.01 peratus ngagai 0.26 peratus maksimum.
Tikas nya enda ngelui tikas ke udah ditetapka Suruhanjaya Komunikasi dan Multimedia Malaysia (SKMM) sereta nitihka piawaian ke ditetapka Suruhaanjaya Antarabansa bagi Perlindungan Sinaran Bukan Pengionan (ICNIRP).
Kelimpah ari nya, pengelicha seminar nya, Chee Lay Heng ari CISSPR Sdn bhd enggau Roha Tukimin ari Agensi Nuklear Malaysia bisi nyaut tanya bekaul enggau chara betapi isu bekaul enggau tiang telekomunikasi.
Nya nyengkaum mungkur ‘ teknologi tanpa wayar’, ‘telekomunikasi mudah alih’ enggau ‘cara kerja antena dan penyebaran (transmisi)’, pangka ngagai mensia, pangka biologi, ‘radiasi tanpa pengionan’ enggau pengirau pasal pengerai mensia mayuh.
Pusin ujian pemadu baru piak nya ngayanka tiang SACOFA enggau pukul rata, 790 kali lebih manah ari piawaian Perlindungan Sinaran Antarabangsa (ICNIRP) ti ditetapka Gerempung Pengerai Sedunya sereta diterima nyadi standard mandatori ke ditetapka Opis Menteri pengerai Malaysia. KUCHING: Semua produk dagang temuai nyengkaum Taman Negara nengeri tu patut digaga sama, dilaku sereta dijaga dibaruh Opis Menteri Dagang Temuai, Seni, Main Asal, Nembiak, Lumba enggau Main.
Menteri Dagang Temuai, Seni, Main Asal, Nembiak enggau Lumba enggau Main, Datuk Abdul Karim Rahman Hamzah madahka, chara nya ulih mantu ngenyakahka agi pengawa ngelakuka produk sereta ngangkatka industri dagang temuai Sarawak.
Nitihku iya, sekeda pengemeran industri bejalaika pengawa ngelaku enggau manah lalu bisi sekeda kurang ngemuaska nyengkaum bekaul enggau pemeresi perengka guna mensia mayuh baka agu ti enda dijaga tauka enda dikemeratka.
“Nya kebuah aku deka ke sekeda Taman Negara ke suah dilawa temuai patut dibaruh jaga Opis Menteri Dagang Temuai. Diatu Taman Negara dibaruh jaga opis kampung.
“Awakka kami ( Opis Menteri Dagang Temuai) megai nya (Taman Negara) laban kami nemu chara nyaga sereta temuai berasai nyamai lebuh datai kia.
“Kami (Opis Menteri Dagang Temuai) deka nyaga, deka nyaga enggau deka ngelakuka, tu sebagi ari ke alai opis menteri dagang temuai mayuh ngambi bagi ba pengawa ngelakuka laban kaitai sayau ke pengeraja asal sereta kami deka serata dunya meda,” ku iya.
Abdul Karim mansutka pekara nya dalam aum pengarang berita, dulu ari nya iya ngulu sereta bejadika Taklimat Akaun Satelit Pelancongan (ASP) Kepada Pemain Industri Pelancongan, ti diatur Unit Pengurusan Data, Opis Menteri Dagang Temuai, Seni, Main Asal, Nembiak enggau Lumba enggau Main ba sebengkah hotel ditu, kemari.
“Ambika chunto, Taman Negara Sabah di baruh jaga Opis Menteri Dagang Temuai, nya kebuah sida amat nyulut (dalam industri dagang temuai),” ku iya.
Bejaku baru iya madahka, nya kebuah semua ejensi enggau opis bekaul enggau industri dagang temuai patut ulih disama-bela tauka disebaka.
Nambahka nya Abdul Karim bepenemu dikena matak mayuh agi temuai menua luar datai ke nengeri tu, Sarawak patut ulih dilawa nengah penyambung tauka penerebai terus ke nengeri tu kelimpah ari chakah ngelakuka produk enggau pakej ngagai temuai.
“Dalam taun 2017, naka ke diatu penyampau temuai ti datai ke Sarawak bisi ngayanka penambah enti dibandingka enggau timpuh sama taun nyin kemari,” ku iya ti enda meri statistik.
Kelimpah ari nya nitihka penerang ari Ketua Perangkaan, Jabatan Perangkaan Malaysia Dr Mohd Uzir Mahidin lebuh ke meri licha madahka di Sarawak bisi lima palan endur ke suah di lawa temuai iya nya mengeri Kuching, Bintulu, Sri Aman, Miri enggau Sarikei.
Lima kandang mengeri nya mayuh dilawa dibandingka kandang menua bukai bepelasarka asil data ke diberi tauka kerejasama pengemeran tauka ke bekaul enggau industri dagang temuai baka hotel enggau kebukai.
Sama bisi dalam aum pengarang berita nya kemari, Menteri Muda Dagang Temuai, Seni enggau Main Asal Datuk Lee Kim Shin, Menteri Muda Nembiak enggau Lumba enggau Main datu Snowdan Lawan, Sekretari Mendam opis menteri, Datu Ik Pahon enggau ke bukai.
Kami (Opis Menteri Dagang Temuai) deka nyaga, deka nyaga enggau deka ngelakuka, tu sebagi ari ke alai opis menteri dagang temuai mayuh ngambi bagi ba pengawa ngelakuka laban kaitai sayau ke pengeraja asal sereta kami deka serata dunya meda. Datuk Abdul Karim Rahman Hamzah Menteri Dagang Temuai, Seni, Main Asal, Nembiak enggau Lumba enggau Main