RES udah mai pemaik ngagai peranak di Jalai Sungai Sut Baleh
KAPIT: Kaban Kunsil Nengeri (ADUN) Pelagus Wilson Nyabong Ijang udah bejadika projek Bekal Kuasa Karan Menua Pesisir (RES) ti diatur di Jalai Ulu Sungai Sut/ Jalai Bena, Sungai Antaroh, Sut di Baleh ditu kena Hari Satu, 9 Oktober tu tadi.
Sebedau tu, peranak dia bepanggai ba injin api meri kuasa karan. Tang enda lama da agi sida deka nerima bekal kuasa karan 24 jam ari Grid Nengeri ti digaga di baruh RES, ti nyadi sebagai ari pemansang dikena ngangkatka tikas pengidup peranak ke diau menua pesisir, ku Nyabong.
Ku iya, projek beungkus RM24 juta pulaika penguntung ngagai tiga buah rumah panjai, 26 pintu bilik Rumah Jugah Emperan, Rumah Belikau Ikau (17 pintu) enggau Rumah Sanggau Kerangan Pulau (28 pintu) di sepanjai Jalai Ulu Sungai Sut, Baleh ditu.
Projek tu berengkah digaga pengudah Gawai Dayak 2017 lalu dipelaba deka tembu dalam bulan March 2018 nengah tali karan ari simpang Jalai Bukit Goram/Jalai Antaroh ke alai 30 kilometer penyauh. Bisi 400 iti tiang deka didirika.
Kunteriktor besai, Revenue Scope Sdn Bhd enggau kunteriktor mit, Liko Installation Sdn Bhd, Kuching.
“RES tu deka nyediaka bekal kuasa karan 24 jam ari Grid Nengeri ngagai tiga buah rumah panjai ke udah disebut tadi. Sebedau pengawa tu berengkah dipejalai, kitai deka miring minta berekat nentuka projek tu ulih lanchar. Kitai enggaika sebarang pekara bukai nyadi,” ku Nyabong nerang.
Ku Nyabong nambah, RES tu sebagi ari inisiatif perintah nyediaka bekal kuasa karan ngagai komuniti menua pesisir kelimpah ari tali karan dalam ai ti nyambung kuasa karan (meraka sungai) ngagai Rumah Minggat enggau Rumah Ukau.
Sida deka bisi bekal kuasa karan ari seberai sungai. Ba endur ke bisi jalai nengah Grid Nengeri seraya rumah panjai ti ngachir di ulu deka digaga ‘Kuasa Solar’. Tu infrastruktur pemun ungkup peranak menua pesisir ti disediaka perintah, kelimpah ari bekal ai enggau jalai, ku Nyabong nambah baru.
Iya ngenang projek nya kala dilanjar laban pengempu tanah ari mua jalai besai enda nyagi kunteriktor tama, tang pengudah iya ( Nyabong) berandau enggau sida ngaul bayar pampas, penanggul nya teputar.
“Pengudah aku berandau enggau sida (pengempu tanah), sida meretika pemaik ngagai komuniti kelebih agi ngagai bala bakih enggau kaban belayan sida empu.
“Udah nya ku sida, sida deka ngasuh ngena tanah enggau nadai minta bayar. Tentu aku enggai ngepunka sebarang pekara (bayar pampas) laban nyema aku mayar, baka ni enggau bagi menua ke bukai di Sarawak, kelebih agi di Baleh ti mungkur kandang menua chukup besai, ke alai tiang elekterik deka didiri.
“Nyema bayar RM30 ke siti tiang mega enda ulih. Nya kebuah aku enggai, aku berandau enggau sida. Bala sida ulih minta projek besai agi tang tanah sida enda dibayar.
“Tebal agi sida enda meretika pekara tu tang pengudah berandau, sida meretika penguntung lalu nya kebuah sehari tu, pengawa minta berekat diatur kitai,” ku Nyabong nerang.
Sekeda bala ke bisi datai ngulu pengawa tu iya nya Penulung Kanan Teknikal Sarawak Electricity Berhad ( SEB) Ajot Ugap, Kerani Kanan SEB Kapit Mike Ngumbang, site supervisor Liko Installation Sdn Bhd, Lihan Ding, Pemancha Enggin Nyipa, Tuai Rumah Emak, Tuai Rumah Ballin Jampong sereta bala tuai rumah di sepemanjai Sungai Sut.