Polisi nyaga pengelikun anak mit endang patut ba program pemansang

SARIKEI: Polisi nyaga pengelikun anak mit nyadi sebagi ari pematut ba program pemansang ti begunaka tanggungpengawa ari semua piak.

Ke bendar, batang tuju polisi tu dikena nyemela entara materialistik enggau pemansang rama, pia ku Kaban Kunsil Nengeri (ADUN) Meradong, Datuk Ding Kuong Hiing.

Berindik ari agenda nyaga pengelikun anak mit mungkur pekara ti besai, iya nya begunaka perambu ti meruan nyengkaum polisi formulasyen, ngelangkar enggau neritka pejalai undang-undang, ku iya nerang lebuh bejadika pengawa nutup Seminar Nyaga Pengelikun Anak Mit diatur Opis Pengintu Pengelantang Mensia Mayuh (JKM) Bagi Menua Sarikei di sebengkah hotel ditu, bedau lama ke udah.

Iya dipadahka seminar tu udah meri bala pesereta definisyen komprehensif nyaga pengelikun anak mit baka ti udah ditetap dalam undangundang, nya alai iya ngarapka sida deka mantaika pengawa tu dikena nyapai tuju iya, ku Ding nyemetak.

Kami ngarapka nadai agi kes nembiak mit dijamah, enda dikeibuh, penyalah beleman sereta penyalah ke bukai dalam komuniti kitai, ku iya nambah.

Pemesai Pengintu Pengelantang Bagi Menua, Tang Kee Lee, nembiak mit ti ngaul satu per tiga tauka bisi 10.5 juta iku ari penyampau tubuh di menua tu dudi hari deka nyadi ketuai megai menua sereta mangku pengawa nempa menua bansa, nya ali, endang patut nyikap sida ngena idup ti menyana, diibun sereta ba pekara pelajar.

Taja pan entara pesaka ti berega tang nembiak mit agi nyadi orang ti kena jamah, kelebih agi sida sebilik empu, ku iya.

Beambika chunto, ku Tang, penyampau tubuh nembiak mit ti kena jamah di bagi menua tu dalam suku keterubah taun tu nambah ngagai 12 ari tujuh kes ba timpuh ke sama taun nyin kemari, seraya nambah, ba timpuh ke sama mega, kes nembiak ngaul diri ngereja penyalah mega nambah ari 11 ngagai 24.

Iya setuju enggau Ding ke alai perintah ngarapka komuniti deka setujuka pengawa nyaga anak mit enggau perati ti berat nentuka nadai agi sebarang kes baru nembiak mit dijamah, diteju pia aja sereta penyalah ke bukai.

Bisi 88 iku pengari ari mayuh macham gempung baka Tim Nyaga Pengelikun Anak Mit, Tim Pengintu Pengelantang Nembiak Mit, raban operator Palan Nyeridi Nembiak Mit (Tadika) enggau Palan Ngibun Anak Mit (Taska) sereta ngempung ukai dikuasa perintah (NGO) udah datai ngulu seminar nya.

Pengelicha ke bisi dikangau rambau atur seminar iya nya Ketuai Seksyen Nyaga Pengelikun Anak Mit JKM Sarawak Umadi Polot, Inspector Afwah Ismail ari Opis Pemansik Penyalah di Opis Polis Pelilih Sarikei enggau Penulung Pemesai Pelajar Pelilih Faustino Frederick Emperan.

Sekeda bala ke bisi datai pengari ari Opis Residen Sarikei Henry Gimong enggau pengari ari Opis Pelilih Sarikei Jahana Yusuf.