Pengerami Ngintu 20 taun SK Kidurong 2 richah

BINTULU: Pengerami Ngintu Genap Taun Ke- 20 Sekula Primari (SK) Kidurong 2 diintu enggau richah ari bala nembiak, pengajar enggau apai indai nyengkaum ejensi ari luar ti ngemujurka pengawa mandang diatur berengkah ari pukul 8 pagi nyentuk 5 lemai di sekula nya, kemari.

Sekeda ari aktiviti ti diatur iya nya pekit ngayam bakul tauka pasu keretas, ngelagu bungai, nyura, ngelinsu, pekayan beragam, kaunter lagu, photobooth, pengawa mandangka penau nembiak mit, chabut tikit benasit, pengawa mandang ari ejensi perintah, peribit enggau gempung ukai dikuasa perintah (NG), sereta pekit ke bukai.

Kepala Pengajar SK Kidurong 2, Helen Chai Siew Lian madah, Hari Tebuka ke diatur beserimbai enggau ngintu genap taun ke-20 SK Kidurong 2, ti udah digaga kenyau ari taun 1997.

“Aku ngiring sekula tu, pengelama tiga taun, 17 taun pengudah meda sekula tu ari jauh. Lebuh tama kitu, aku belajar bemacham pekara ari sukut ngatur pengawa, kaul enggau bala apai indai, komuniti sereta ke bukai.

Taja bedau lama, aku ulih meda sereta gawa enggau bala staf ari dua buah sekula berengkah di SK Kampung Baru mindah ngagai SK Kidurong 2 lalu tu dikena aku ngemanahka gaya pengawa diri.

Nya alai iya meri terima kasih ngagai Opis Pelajar Nengeri Sarawak enggau Opis Pelilih Pelilih Bintulu laban milih iya ngetuaika sekula nya.

Pia mega iya meri terima kasih ngagai bala staf enggau apai indai ti andalka atur pengawa digaga iya lalu udah matak mayuh perati bala sida.

“Apai indai enda kala leju nganjung bala anak sida besekula dataika penyampau tubuh nembiak enda ulih ditampung agi,” ku iya.

Taja pia, Helen nangkan bala apai indai ngambika enda semina milih sekula nya laban semak enggau rumah, tang patut milih belalauka pengandal ba atur pengawa sereta raban ngatur pengawa sekula ti ulih ngemansangka pelajar bala anak sida.

“Pekara ti beguna endar, sekula ulih mantu ngemansangka pelajar bala anak ngagai tikas ti dikearap,” ku iya nambah.

Ngelansa pasal SK Kidurong 2 ku iya, dalam timpuh 20 taun, sekula nya udah mayuh berubah sereta mansang lalu kala bulih anugerah ba renggat nasional nyadi sekula bibas dadah.

Tandu iya nyemetak, taja bulih anugerah bibas dadah, tang kitai patut bejejaga laban dadah ulih ngelekai ngagai sebarang alai.

“Anugerah tu enggau bemacham ke udah dijapai sekula nya, nyangka kitai ulih nyediaka penerang enggau sejarah ti nyadi dalam timpuh 17 taun, ari taun 1997 dataika 2014, sebedau tiga taun aku ngiring sekula tu,” ku iya.

Ngelansa pasal Hari Tebuka nya ku iya, sida ngarapka ulih betemu enggau semua apai indai, ngerapitka kaul sereta ulih bejual dikena ngiga belanja mantu kelab ngintu pengelantang pendiau staf sekula nya.

“Nengah asil tu deka mantu kitai ngatur kus dalaman, penanda aras, khairat, bantu ngagai bala nembiak ti dituntung penusah sereta ke bukai,” ku iya seraya ngarapka belanja pengasih deka seruran nerima bantu enggau sukung semua piak.

Sama bisi datai Sekretari Politik Kaban Parlimen Bintulu, Teo Ho Ping, Pemesai Pelajar Pelilih Bintulu, Fred Entau, bala pengajar, apai indai sereta bala nembiak.

Kepala Pengajar SK Kidurong 2 sebedau tu dipenggi Norjanah Abdullah ari taun 1997 ngagai 1998, Mohamad Sahran Amin, Hashim Busrah (1998-2001), Norjanah Abdullah

(2004-2007) sereta Jama’ah Muris (2007-2015).

RINDU MEDA: Teo enggau Fred diberi rindu meda pekara ke bisi dipandang ba sukut kulinari.

GENAP TAUN: Teo nanam pun bungai kelai ngintu Hari Tebuka beserimbai enggau Ngintu Genap Taun Ke-20 SK Kidurong 2 seraya dikemata Helen enggau Fred (kanan) sereta bala bukai.

PENERANG: Teo disempulang Helen, Fred enggau bala pengajar sekula ke bukai meda bansa dadah ke bisi dipandang Pampang narkotik Indu Opis Polis Pelilih Bintulu.

BAKA TU: Nembiak kolej vokasional nunjukka chara ngaga buk.

LANDIK: Siku nembiak ari sebuah kolej vokasional nunjukka pengelandik iya ngias kukut siku nembiak.

MANAH: Tiga iku nembiak SK Kidurong 2 diberi penerang pasal bansa dadah bahan ti enda tau diguna.