PBSM SJK Chung Hua No 5 ngatur pengerami nyerumba ‘Festival Kek Bulan 2017’

KUCHING: Nyerumba ‘Festival Kek Bulan 2017’, raban ‘ Malaysian Red Crescent (PBSM) Stampin Chapter’ Sekula Primari Bansa ( SJK) Chung Hua No 5, Kuching udah ngatur pengerami berambaika jaku ‘We Care, We Love’ bedau lama ke udah.

Bala sida udah ngatur pengerami enggau raban ke diau di Rumah Seri Kenangan, Rumah Cheshire Sarawak, Palan Orang Buta sereta pesakit di Sepital Sentosa, bedau lama ke udah.

“Batang tuju aktiviti servis komuniti tu dikena ngajar bala kaban gerempung tu ngambika bisi pengasih sereta deka kiruhka raban ke diau dia sereta mega bala pesakit,” ku Kepala Pengajar SJK Chung Hua No 5 Kuching, Chin Mui Ling, nengah penerang berita sekula, bedau lama.

“Kami bisi nyediaka kek bulan ti nyamai sereta pemeri ke bukai disadung ngagai rumah enggau sepital, deka ngemai pengelantang enggau pengaga ngagai sida ke diau dia,” ku iya nambah.

Chin meri terima kasih ngagai bala apai indai, pengajar enggau bala nembiak ti udah gerah jari nyuaka pemeri dikena ngemujurka aktiviti servis komuniti nya.

UNGKUP ALBUM: Begambar ungkup kenang raban ke diau di Palan Orang Buta enggau sekretari iya, Alice Soo bediri (kiba) sereta Penulung Kanan Ko-Kurikulum SJK Chung Hua No 5, Kuching Vun Huey Ni sereta bala kaban Gempung Palang Merah Chapter Stampin.

BEGULAI NGINTU: Penulung Kanan Ko-Kurikulum SJK Chung Hua No 5, Kuching Vun Huey Ni bediri (tiga kanan) nyuaka kek bulan enggau pemeri ngagai Pemesai Pengintu Pengelantang Rama Rumah Seri Kenangan, Awang Iskandar di rumah orang tuai.

UNGKUP KITA: Penulung Kanan Ko-Kurikulum SJK Chung Hua No 5, Kuching Vun Huey Ni (kanan) nyuaka kek bulan enggau pemeri ngagai Matron Jimen di Sepital Sentosa.