Ketuai bansa Dayak ngarapka Jaku Iban bela dipelajar bansa bukai
Pengeransing tu nyata lebuh ti ex-Sapit KM bebendar ngangkatka Jaku Iban dipelajar di sekula sekondari
SIBU: Ketuai bansa Dayak ba perintah nengeri ransing ati deka meda Jaku Iban bela dipelajar nembiak bansa bukai di menua tu.
Sapit Kepala Menteri Datuk Amar Douglas Uggah Embas madah, pekara tu bepun ari ti deka nampung pengeransing ex-Sapit Kepala Menteri Datuk Patinggi Tan Sri Alfred Jabu Numpang ti udah bebendar ngangkatka Jaku Iban dipelajar di sekula sekondari.
“Pengeransing iya patut ditandu kitai diumbaka iya mengkang ransing ngemansangka Jaku Iban nyentuk ke diatu.
“Iya mega ukai semina ngepunka Jaku Iban diajar ba sekondari tang pengeransing iya nyadika pengemun bala bukai nyengkaum pengajar bela ngemansangka jaku tu.
“Nya alai, diatu kitai ari perintah nengeri deka nandu pekara tu ngambika Jaku Iban semampai diajar di sekula ti ukai semina diajar ba nembiak bansa Iban aja tang deka dipelajar nembiak bukai ba menua tu,” pia ku iya madah.
Iya mantaika jaku tu maya bejadi Seminar Daya Idup Iban Renggat Kedua ti diatur ba sebuah hotel tebilang ditu, kemari.
Sama bela datai maya tu iya nya Penyanding Penemu Pemansang Sains Nengeri Alfred Jabu enggau Direktor Institut Pematih Pengajar (IPG) Kampus Rajang ti mega chairman komiti pengatur seminar Dr Lambat Lindong sereta bukai.
Uggah ti mega Menteri Betanam Betupi Moden, Tanah Adat enggau Pemansang Kandang Menua madah, maya
Pengeransing iya patut ditandu kitai diumbaka iya mengkang ransing ngemansangka Jaku Iban nyentuk ke diatu. Datuk Amar Douglas Uggah Embas Sapit Kepala Menteri
Jabu ngemeratka Jaku Iban meseti diajar di sekula suba, Jabu nyengala ngembuan timpai penemu ti jauh.
“Iya nemu enti diajar ba sekula, dia pekara bukai ti bela meri penguntung ngagai bansa Iban mega bisi nyangking.
“Tu baka nentuka Jaku Iban enda punas enggau ngetanka main asal bansa Iban,” ku iya madah baru.
Bekenangka seminar nya, Uggah maya tu ngarapka seminar nya tau disempulang enggau randau bekaul isu ke nyadi lebih agi penanggul infrastruktur ba pengawa ngajar baka latih ke enda chukup, bup malin, bup kereja enggau penyampau pengajar ti enda chukup.
“Piak kitai semampai besedia ninga sereta nyaup deka mutarka isu ke bisi nyadi baikka diputar enggau lengkas tauka diputar bekenaka timpuh.
“Aku besemaya isu ti bisi dirandau deka dibai ngagai piak ti bekaul,” ku iya madah.
Kelimpah ari nya, iya madah, pekara bukai ke mega enda tau ditinggal iya nya sentang bakani daya idup Iban maya hari tu tau nyaup ngemansangka bansa Iban ba pekara dagang tauka pemansang pelajar ti seririh enggau ubah menua tu diatu ke benung ngelawa ekonomi digital.
Kelimpah ari nya, iya andal amat seminar nya tau nyadika platform bejuraika penemu sentang isu Pulau Galau enggau Pemakai Menua (PMPG).
Uggah madah, perintah enda ulih kelalu begaut ngaga pemutus senentang dua iti isu tu lebih agi diatu penanggul ke bisi nyadi iya nya bekaul enggau definisi ke enda sebaka ba sesebengkah bansa asal ditu.
“Tu nyadika penanggul tang kitai besedia mendingka penemu mayuh sereta chakah mutarka isu tu,” pia ku iya nerang. KUCHING: Kaunselor ke ( Hal Ehwal Mensia Mayuh), Opis Kedutaan United States of America ke baru, Bradley A. Hurst, ke bepalan di Kuala Lumpur bisi ngelawa Kuching, ujung minggu siti nyin tadi, pengudah nemuai ngagai Kota Kinabalu, dalam pejalai iya betemu enggau bala pengarang berita ba tiap pelilih menua tu.
Hurst, ke nyadi kepala pampang (Public Affairs) ngarika opis kedutaan nya nyadi (spokesperson) sereta ngemansangka strategi diplomasi mensia mayuh, baru datai di Malaysia, nganti endur Frank Whitaker ke udah pindah ngagai menua bukai. Sebedau tu, Hurst kala gawa ba Kedutaan United States of America bepalan di Estonia dalam kandang 3 taun.
Ba penemuai Hurst tu tadi, iya disempulang ulih George betemu enggau raban pengarang berita ari Kuching, ke bisi nyamu pengarang berita ba restoran ‘The Lepau’ ditu, kena Hari Lima minggu nyin tadi.
Entara pekara ke bisi dikerandau, iya nya kaul opis Kedutaan United States of America enggau raban pengarang berita menua tu berat endar, kelebih agi mayuh ari pengawa ke di- gaga opis kedutaan nya, bisi besangkut paut enggau adat pesaka, sosio- ekonomi, pelajar, kaul politik sereta mayuh agi pekara bukai asil ari kerejasama kededua buah menua tu.
Entara raban pengarang berita ke bisi betemu enggau Hurst, iya nya chairman Gerempung Pengarang Berita Komanwel, Alice Wee, Group Senior Managing Editor The Borneo Post enggau Utusan Borneo, Francis Chan, pemangku chairman Gerempung Pengarang Berita Pelilih Menua Kuching, Jacqueline David, sereta raban pengarang berita bukai.