Seminar Daya Idup Iban Ke-2 dikearap ulih ngiri mayuh penemu
SIBU: Seminar Daya Idup Iban 2017 Renggat Kedua dikeandal ulih nambahka penemu senentang daya idup Iban maya hari tu.
Direktor Institut Pematih Pengajar ( IPG) Kampus Rajang ti mega chairman komiti pengatur seminar Dr Lambat Lindong madah, program nya digulu 292 iku penyereta.
Sida tu iya nya bala pengelicha Jaku Iban ari Palan Pematih Pengajar (IPG), bala pengajar Jaku Iban enggau bala nembiak ke ngambi pelajar Jaku Iban ari IPG Rajang enggau IPG Sarawak Miri.
“Kelimpah ari nya, tuju kitai ngatur program tu laban deka majakka pengerembai profesionalisme nengah pansik sereta licha ke dibantai ari keretas kereja ba program.
“Ukai semina nya, seminar tu bela nyadika menalan alai berandauka isu enggau ubah ke bisi nyadi ba daya idup Iban dalam konteks jeman globalisasi diatu,” pia ku iya madah maya pengerami bejadi Seminar Daya Idup Iban 2017 Renggat Kedua ditu, kemari.
Pengerami nya dipenyadi Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas.
Seminar tu diatur begulai IPG Kampus Rajang, Gerempung Pemansang Pelajar Jaku Iban (AEDIL) enggau Serakup Indu Dayak Sarawak (SIDS) pampang Kapit.
Penyanding Penemu Yayasan Tun Jugah Dato Sri Edmund Langgu Saga mantaika keretas kereja ‘ Jaku Dikena Maya Pengerami Melah Pinang’, Pengelicha IPGK Sarawak Miri Dr Nelson Tandang Edwin Unting (Teori Pansik Tek: Struktural enggau Pragmatik) enggau Dr Corella Stephen ari IPG Kampus Rajang ( Faktor Jaku Bechampur dalam Raban Bansa Iban di Sarawak) nyadi pengelicha seminar nya.
Nampung jaku iya baru, ku Lambat, program nya dikeandal ulih negutka agi kerejasama strategik IPG enggau Institusi Pelajar Tinggi sereta gerempung ukai dikuasa perintah (NGO) ti bela mulaika penguntung ngagai diri ba tuju ngeringka sereta ngetanka Jaku Iban seririh enggau ubah maya dia.
“Seminar tu bela dikena kitai ngatur malam main asal alai piak kami naka alah mantaika element main asal Iban ngambika dipeda bala ke bisi datai,” ku iya sambil madah rambai jaku seminar tu iya nya ‘Bejalai Betungkatka Adat Tinduk Bepanggalka Pengingat.
Sama bela datai maya pengerami tu iya nya exSapit Kepala Menteri ti mega Penyanding Penemu Pemansang Sains Nengeri Datuk Patinggi Tan Sri Alfred Jabu Numpang.