Pedagang kraf patut ngena awak pemansang DE
Ekonomi digital deka meri jalai ngagai pedagang ngelakuka produk ba makit antarabansa
MIRI: Pedagang asil pengelandik jari di Sarawak diperansang ngena memanah pemansang arus teknologi kemaya hari lalu ngaul diri ba dunya ekonomi digital (DE) ke alai sida ulih nyual produk ba makit ti besai agi.
Menteri Muda di Opis Kepala Menteri ke lalu nyadi Kaban Kunsil Nengeri (ADUN) Kakus, Datuk John Sikie Tayai, madah, berengkah ari taun 2018, perintah nengeri deka rat bejalaika pengawa nyediaka palan di media rama enggau elektronik dikena ngelakuka asi pengelandik jari ari nengeri tu.
John ke mega Chairman Kaunsil Kraf Sarawak (MKS) madah, dikena ngepunka singkang ngagai dunya digital tu, MKS enggau kerejasama ejensi perintah bekaul deka ngatur kus ungkup sida ke bisi ati sereta meretika pekara bekaul internet enggau digital.
“Enti kita enda nemu, anjung bala anak kita ngulu kus tu laban sida tu rebak baru kemaya ari ti mereti endar bekaul pengerembai dunya digital enggau ulih muntang agi mereti sereta nemu ekonomi digital tu,” ku iya nerang.
Bejaku rambau pengerami makai lemai nyerumba pengawa nutup Minggu Kraf diatur MKS di sebuah hotel tebilang ditu, ku John, pedagang asil pengelandik jari patut nyingkang sama enggau kaban dagang dalam bidang ke bukai ti berengkah nyingkang ngagai dunya ekonomi digital, laban nyema sida enda baka nya sereta enda sikar ngerebut peluang, nya tau ngasuh sida tinggal di belakang ba makit ti bisi tatak.
Berebak enggau nya, John mega dekaka raban pedagang asil pengelandik jari di nengeri tu patut kreatif enggau inovatif agi ngambi ngemayuhka produk sida.
Iya enggaika raban pedagang meruan ngemeranka chara lama sereta natak diri tang patut nangkup peminta enggau peneka orang ti meli kemaya hari.
“Ambika chunto ba pengawa nganyam, enti suba kitai ngayam tikai ari buluh, wi enggau bemban aja, tang kemaya hari MKS udah mantu ngemesaika kreativiti pedagang enggau ngepunka penemu ngayam kantung sandik ti bemacham gaya, bakul, rantai kunchi, lampu mija enggau ke bukai.
“Kreativiti enggau inovasyen tu patut bisi, nya kebuah aku meransang raban pedagang ngambika ‘ngintu’ pelanggan ti datai ngagai bangsal sida sereta betanya nama ti dikedekaka sida? Ari nya, kitai ulih nempa barang baru tauka produk baru ti dikeinginka pelanggan,” ku iya nerang silik.
Ba lansa bekaul, ku John, MKS merambu deka ngatur ‘Pasar Kraf’ ti deka diatur di tetiap pelilih menua tang bepanggai ba peminta pedagang asil pengelandik jari, berengkah ari taun baru.
Dikena ngepunka program nya ku iya, MKS deka ngatur Pasar Kraf dua bulan sekali, ngambika pedagang kraf nyual bemacham produk sida ngagai mensia mayuh, MKS mega deka mantu nyediaka bangku, mija enggau publisiti, seraya endur pasar nya, MKS deka minta saup tauka kerejasama sida ti ngempu taba.
Ku John nandu, ngelansa Minggu Kraf ti diatur di Bintang Megamall ditu berengkah ari 4 ngagai 8 Oktober tu tadi udah nerima timbal ti chukup manah ari pedagang asil pengelandik jari ti rejista enggau MKS tauka pengusung ke bisi datai.
“Pengawa bejual sekali tu ukai semina nyapai tagit iya nya RM250,000 tang ngelui ari nya, manggai RM262,900
Enti kita enda nemu, anjung bala anak kita ngulu kus tu laban sida tu rebak baru kemaya ari ti mereti endar bekaul pengerembai dunya digital enggau ulih muntang agi mereti sereta nemu ekonomi digital tu. Datuk John Sikie Tayai Menteri Muda di Opis Kepala Menteri
dalam timpuh lima hari tu. Meri pengaga ati ngagai semua kita,” ku iya temegah.
Lebih 60 iku pedagang asil pengelandik jari ari serata nengeri (ari Lundu dataika Lawas) udah nyereta pengawa mandang enggau nyual sekali tu, ke alai bisi 52 bangsal enggau beberapa iku pedagang bekunsi lalu bekerejasama ba siti bangsal, meri awak enggau peluang ngagai pangan diri.
Sama bisi datai, bini John, Datin Melia John, Manijar MKS, Diweng Bakir enggau bala pemesai MKS sereta pengari ejensi perintah bekau.