CRM JPJ udah diaku SPRM nyadi model ngagai ejensi penerit adat
KUCHING: Pengurusan Risiko Rasuah (CRM) Opis Perengka Pengangkut Jalai ( JPJ) udah diaku Komiti Penagang Makai Suap Malaysia (SPRM) sereta nyadi model ngagai ejensi penerit adat.
Sapit Ketuai Direktor JPJ Malaysia, Datuk Wan Ahmad Uzir Wan Sulaiman madahka, CRM nya sebengkah kereban ngaduka pengawa ti mantu numbuhka seiti sistem ke nyaga tauka ngemata ti ngemeranka atur enda setujuka pengawa makai suap sereta ngemeratka integriti.
CRM JPJ udah dikemansang sereta dipenyadika ba taun 2016, ku iya.
“CRM kitai ( JPJ) udah nyadi model ti diaku SPRM empu ba indu opis, ke alai kami entara ejensi penerit adat ti bisi CRM.
“Laban kitai udah bisi CRM, kitai patut ngayanka kitai nyadi model lalu enti ulih anang sesekali ngereja pekara ti ngelanggar integriti,” ku iya.
Ahmad Uzir mansutka pekara nya dalam aum pengarang berita pengudah ti bejadika ‘Majlis Ikrar Bebas Rasuah JPJ Nengeri Sarawak’, ti diatur ba Indu Opis JPJ Negeri Sarawak ditu, kemari.
Nitih ku iya di Malaysia bisi urung 8,000 pengereja pengawa opis JPJ.
Bejaku baru iya madahka agenda integriti ukai semina retorik tang begunaka penyedar, pengibuh, pengemeran enggau pengemerat ba tetiap renggat enda ngira maya enggau endur.
Ku iya, nya amat beguna laban JPJ ejensi ke dimua ti betapi enggau mensia mayuh, udah tentu mayuh penguji enggau pemar ditapi.
Kelimpah ari bejalaika CRM dikena ngangkatka integriti opis JPJ, entara pekara ti ditumbuh sereta dipejalaika ois nya baka numbuhka bagi integriti, pelan strategik opis 2016- 2020, pelin integriti opis, ikrar integriti korporat, program advokasi integriti, ‘pematuhan urusniaga JPJ’ sereta ngerembaika servis online JPJ.
“JPJ terus chakah nempa enggau ngenegapka agi ulah integriti ba raban pengereja pengawa opis nya.
“JPJ amat betuah laban udah dipilih nyadi sebuah ejensi pemungkal bejalaika ISO 37001: 2016- AntiBribery Management System (ABMS).
“Tu standard antarabansa ti baru ditumbuhka dikena mantu organisasyen bejalaika sistem ngadu ti enda rinduka pengawa makai suap, nengah chara nagang, nyidi enggau betapi sereta mutarka penanggul makai suap,” ku iya.
Lebuh ke ngenang pasal pengawa ngangkat’ Ikrar Bebas Rasuah’ (IBR), Ahmad Uzir ngarapka semua pengereja pengawa dalam opis nya ulih ngamatka semaya ke udah dibacha enggau disain lebuh bejalaika pengawa.
“Integriti tu beguna amat dikena nyeliahka ari anggap negatif mensia mayuh, nya alai laban kitai udah besemaya tauka macha sereta nyain IBR kitai patut ngamatka pekara nya,” ku iya.
Sama bisi datai kemari, Direktor JPJ Negeri Sarawak Mohd Shafiq Anas Abdullah, Sapit Direktor SPRM Negeri Sarawak Zulhairy Zaidel enggau ke bukai.