Pengerami Hari Nembiak Renggat Nengeri Sarawak 2017 deka diintu di Betong

KUCHING: Pengerami Hari Nembiak Renggat Nengeri Sarawak 2017 deka diintu di Betong kenaka 27 nyentuk ngagai 29 Oktober 2017.

Ngempung beribu raban nembiak ari selampur Sarawak, pengerami deka dipenyadi Kepala Menteri Datuk Patinggi Abang Johari Tun Openg kena 28 Oktober di Dewan Sukan, Tan Sri Datuk Amar Stephen Kalong Ningkan.

Nitihka penerang Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah, Anugerah Belia Sarawak deka diberi ngagai sekeda raban nembiak ke nyulut ba pengawa sida.

“Tiga iku nembiak ke udah nyulut ba pengawa sida deka nerima gelar “Anugerah Belia Sarawak 2017” lalu deka disua Abang Johari,” ku Abdul Karim ba aum pengarang berita di Begunan Baitulmakmur ditu, kemari.

Dulu agi ari nya iya udah nguluka aum pengerami ngintu Hari Nembiak Renggat Nengeri Sarawak 2017.

Ngenang kaul ke sama, Abdul Karim madah tiga iku ke nerima gelar nya dipilih ari mayuh raban nembiak ke bisi nempa pemujur ba pengawa sida.

“Kitai milih tiga iku ari lelaki enggau orang indu ngambika gelar ke diberi tu tampak agi rita,” ku iya.

Ku iya nambah, randau “Youth Townhall’ begu- lai enggau Abang Johari deka diadu pengudah tembu pengawa bejadi di palan ke sama.

Entara sekeda program ke bisi ditusun rambau tiga hari pengerami iya nya Belia Idol & Battle of the Band, Konsert Belia, Belia Kitchen sereta bansal bejual, Youth Rock Climbing, Youth Fun Run enggau ke bukai.

Pengerami diatur enggau tuju meri basa ngagai pengawa ke udah diadu raban nembiak ba atur pemansang di nengeri tu ngelamatu.

Bela datai Menteri Muda Nembiak enggau Lumba Datu Snowdan Lawan, Sekretari Mendam Datu Ik Pahon enggau Adun Layar Gerald Rentap.