Bansa Dayak patut dikelala ba Federal Konstitusyen: PBDS Baru

KUCHING: Parti Bansa Dayak Sarawak (PBDS Baru) andalka Menteri ba Opis Menteri Besai Datuk Joseph Entulu Belaun ti udah mutar pekara bekaul enggau isu bansa Dayak ti enda dikelala nyadi sebengkah ari bansa ke nguan menua Malaysia nitihka Federal Konstitusyen.

Artikel 161 (a) enggau (7) nerang ke alai bisi peranak bansa asal ti ukai Islam ke nguan menua Sarawak.

Tang taja pia ku Presiden PBDSB Cobbold John, genteran nya enda nyebut enggau nyemetak bengkah gerempung besai bansa asal tu lalu ngeletakka bansa ‘lain-lain’ ba Pom Opis Perintah enggau sebarang pom ti bekaul.

“Nya alai, PBDSB ngarap amat ke pekara tu diperati enggau silik agi.

Datuk Joseph Entulu seiku ari orang ti mesuka pekara tu lalu kala bekimpin meri penerang ka pekara tu di Kuching, Sibu enggau Bintulu”, ku Cobbold kemari.

Berindik ari nya ku Cobbold nambah, PBDSB ti ngarika Bansa Dayak,minta iya nyaut sereta nerang ka pekara tu ba mua mayuh, sekalika pekara tu kala dibantai ba Parlimen Malaysia?.

Iya nambah tajapan Komiti Teknikel Bumiputera udah ditumbuh ngambi ulih ngintu pekara ke bekaul, tang pengawa sida semina nukar ubah ‘lainlain’ ba pom lalu nadai kuasa ngubah genteran 161(a) & 7 Federal Konstitusyen.

“Pekara tu meri pemalu besai ngagai bansa Dayak sereta mega ketuai bansa Dayak ti benung megai tugu kuasa ketegal bansa Dayak enda dikelala ba undang-undang menua Malaysia ti ngujung ka bansa Dayak sebengkah ari bansa ti nadai nama ba undang-undang menua.

Ngenang pekara bukai, Cobbold madah isu ti deka ngelabuhka ukum RM1000 ngagai sida ti laun ari 60 hari ngaga surat peranak, mega sebengkah pekara ti enda patut, lalu madahka PBDSB udah mansutka bantah ba penerang berita.

“Datuk Masir Kujat patut nukup pekara tu ari pun lalu ukai mansutka penemu sepengudah bisi bantah.”

Tu mandangka iya enda berunding dulu ka peranak Sabah enggau Sarawak lalu pemedis rayat ditu ti nadai kad pengelala.

“Engka iya nangika jaku “jangan lawan towkay”, pia ku Cobbold.